बुसान : भारताच्या पुरुष व महिला संघांनी जागतिक सांघिक टेबल टेनिस स्पर्धेची बाद फेरी (राऊंड ऑफ ३२) गाठली. भारताच्या दोन्ही संघांनी मंगळवारी साखळीत दमदार विजय नोंदवले. या स्पर्धेत दोन्ही गटांत उपांत्यपूर्व फेरीत प्रवेश करणारे आठ संघ पॅरिस ऑलिम्पिकसाठी थेट पात्र ठरणार आहेत.
बुसान येथे सुरू असलेल्या या स्पर्धेत भारतीय महिलांनी स्पेनला पिछाडीवरून ३-२ असे नमवले. श्रीजा अकुला व मनिका बत्रा यांना एकेरीच्या सामन्यांत पराभव पत्करावा लागल्याने भारतीय संघ ०-२ असा पिछाडीवर होता. मात्र त्यानंतर अहिका मुखर्जीने एल्विरा राडला ४-१ अशी धूळ चारली. मग मनिका व श्रीजा यांनी परतीच्या लढतीत विजय मिळवून भारताला आगेकूच करून दिली. भारतीय संघ अ-गटात चार सामन्यांतील तीन विजयांसह दुसऱ्या स्थानी राहिला. चीनने गटात पहिला क्रमांक मिळवला.
पुरुषांमध्ये भारतीय संघाने न्यूझीलंडला ३-० असे नेस्तनाबूत केले. हरप्रीत देसाईने चोई टिमोटीला ३-०, तर जी. साथियनने अल्फ्रेड डेलाला ३-० असे नामोहरम केले. मग मनुष शाहने मॅक्सवेल हेंडरसनवर ३-२ अशी मात करून भारताचा विजय पक्का केला. ४० संघांचा समावेश असलेल्या या स्पर्धेच्या राऊंड ऑफ ३२ फेरीला बुधवारपासून प्रारंभ होईल.