शहापूर : शहापूर तालुक्यातील आदिवासी विकास महामंडळाची भात खरेदी दरवर्षी एक - ना - अनेक कारणांनी गाजत असते. या महामंडळाच्या अंतर्गत येणाऱ्या आधारभूत भात खरेदी योजनेत मौजे -चारिव केंद्रामध्ये सुमारे १ कोटी रुपयांचा भ्रष्टाचार झाल्याने महामंडळातर्फे चारीव केंद्रचालक हेमंत शिंदे यांच्यावर किन्हवली पोलीस ठाण्यात गुन्हा दाखल करण्यात आला आहे. विशेष म्हणजे हा गुन्हा आदिवासी विकास महामंडळाच्या भात खरेदी आणि बारदान बाबतची तफावत असल्यामुळे व शेतकऱ्यांना भात खरेदीबाबत खोट्या पावत्या दिल्यामुळे दाखल करण्यात आला आहे.
आदिवासी विकास महामंडळातर्फे शहापूर तालुक्यात आधारभूत खरेदी योजनेनुसार भात शेतकऱ्यांकडून खरेदी केली जाते. यंदा शहापूर तालुक्यात भात खरेदी केंद्रात हजारो क्विंटल भाताची खरेदी केलेल्या १३ हजार ४४१ क्विंटल भातामध्ये २ हजार ९९५ क्विंटल भाताच्या मालामध्ये मोठ्या प्रमाणात तफावत आली असून ७५९९ बारदाणाचीही तफावत असल्याचे निदर्शनास आले आहे. यामुळे या प्रकरणात ९८ लाख ७ हजार रुपयांच्या भाताचा घोटाळा झाल्याचे दिसून येत आहे.
बनावट पावत्या बनवून शेतकऱ्यांची व आदिवासी विकास महामंडळाची फसवणूक करून सुमारे १ कोटी भात मालाची तफावत आल्यामुळे आदिवासी विकास महामंडळाचे शहापूर उपव्यवस्थापक सागर सोनवणे यांनी २५ मे रोजी शहापूर तालुक्यातील किन्हवली पोलीस ठाण्यात गुन्हा दाखल केला होता. याबाबतचा अधिक तपास सुरू आहे.
शहापूर तालुक्यात अजूनही भात खरेदी केंद्रांची उचल चालू आहे. लवकरच याबाबत भ्रष्टाचार उघड होण्याची शक्यता आहे. केंद्र चालविणारे जे सोसायटीचे चेअरमन व सचिव यांची उच्च पातळीवरून चौकशी होण्याची शेतकरी मागणी करत आहेत.