उल्हासनगर : कर्तव्यावर असलेल्या पोलीस कर्मचाऱ्याची तडीपार गुंडाने कॉलर पकडून हुज्जत घातल्याची घटना घडली आहे. आता याप्रकरणी तडीपार गुंड सूरज उर्फ मॉन्टी अशोक संदनशिवला पोलिसांनी बेड्या ठोकल्या आहेत.
उल्हासनगर पोलीस ठाण्यात कर्तव्यावर असलेले पोलीस कर्मचारी सिद्धार्थ गायकवाड हे आयडिया कंपनीजवळ गस्त घालत होते. त्यावेळी आरोपी सूरज उर्फ मॉन्टी अशोक संदनशिव हा मिळून आला. परंतु त्याने थेट पोलिसाशी हुज्जत घालून थेट कॉलर पकडली. यानंतर इतर पोलिसांच्या मदतीने त्याला ताब्यात घेण्यात आले. मॉन्टी हा सराईत गुन्हेगार असून तडीपार असताना देखील शहरात बिनधास्त फिरत होता. त्याच्या विरोधात यापूर्वीही गंभीर स्वरूपाचे गुन्हे दाखल आहेत. आता याप्रकरणी उल्हासनगर पोलीस ठाण्यात सरकारी कामात अडथळ्याचा गुन्हा दाखल करण्यात आला आहे.