डोंबिवली : कल्याण तालुक्यातील निंबवली गावात राहणाऱ्या १६ वर्षीय अनिश दळवी या विद्यार्थ्याने राहत्या घरी आत्महत्या केल्याची घटना घडली होती. अनिशला आत्महत्या करण्यास प्रवृत्त केल्याचा ठपका टिटवाळा पोलिसांनी सेक्रेड हार्ट शाळेचे संचालक ऑलविन अँथोनी याच्यावर ठेवला होता. याप्रकरणी ऑलविन अँथोनी याच्यावर गुन्हा दाखल करीत अटक करण्यात आली आहे. ऑलविन अँथोनी याला शुक्रवारी १२ तारखेला कल्याण न्यायालयात हजर केले असता न्यायालयाने त्याला चार दिवसांची पोलीस कोठडी सुनावली आहे.
एका विद्यार्थिनीसंदर्भात अनिशने आपल्या मित्रांसोबत सोशल मीडियावर एक पोस्ट केली होती. शाळा प्रशासनाने पोस्ट टाकणाऱ्या विद्यार्थ्यांसह अनिशला बोलावून बेदम मारहाण करत तुमचे लिव्हिंग सर्टिफिकेट तुमच्या घरी येईल अशी ताकीद देत घरी पाठवले. याचाच धसका घेत अनिशने आत्महत्या केल्याचा आरोप त्याच्या नातेवाईकांनी आरोप केला.