ठाणे महापालिकेच्या निवडणुका येऊ घातल्या असताना सर्वच राजकीय पक्ष कामाला लागले आहेत. पालिका निवडणुकीत महाविकास आघाडी एकत्रित निवडणूक लढवणार की स्वतंत्र लढणार यावर अजून शिक्कामोर्तब झाले नाही. असे असताना राष्ट्रवादी काँग्रेसने मात्र सभागृहात नगरसेवक वाढीचा संकल्प केला आहे. ठामपाच्या निवडणुकीत राष्ट्रवादीच्या नगरसेवकांची संख्या २३ ने वाढवून ५९ वर नेण्याचा निर्धार शहराध्यक्ष आनंद परांजपे यांनी व्यक्त केला. विशेष म्हणजे, उपस्थित कार्यकर्त्याकडून परांजपे यांच्या या निर्धाराचे स्वागत करण्यात आले. राष्ट्रवादी काँग्रेसचा २३ वा वर्धापन दिन ठाणे पक्ष कार्यालयात ठाणे, पालघर जिल्हा समन्वयक तथा ठाणे शहराध्यक्ष आनंद परांजपे आणि ठाणे, पालघर महिलाध्यक्षा ऋताताई आव्हाड यांच्या उपस्थितीत मोठ्या उत्साहात साजरा करण्यात आला. यावेळी राष्ट्रवादीच्या कार्यकर्त्यांनी नवा संकल्प केला.

राष्ट्रवादी काँग्रेसच्या २३ व्या वर्धापनदिन सकाळी १० वाजून १० मिनिटांनी शहराध्यक्ष आनंद परांजपे आणि ऋताताई आव्हाड यांनी राष्ट्रवादीच्या ध्वजाचे आरोहन केले. त्यानंतर कार्यकर्त्यांना मार्गदर्शन करताना आनंद परांजपे यांनी शुक्रवारी आपण पक्षाच्या २३ व्या वर्धापनदिनानिमित्त एकत्र आलो आहे.