ठाणे : नवीन वीजमीटर बसवून देण्यासाठी तब्बल सव्वा लाख रुपयांची लाच मागणाऱ्या महावितरणच्या कर्मचाऱ्यासह एका खासगी व्यक्तीला ठाणे लाचलुचपत प्रतिबंधक विभागाने रंगेहाथ पकडले. सुरुवातीला एक लाख ३० हजार रुपयांची मागणी करण्यात आली होती. तडजोडीनंतर एक लाख २५ हजार रुपये स्वीकारताना ही कारवाई करण्यात आली. महावितरण कर्मचारी जयंत रामभाऊ शिवकर (५१) आणि खासगी व्यक्ती दर्शन शशिकांत साळवी अशी अटक केलेल्या आरोपींची नावे आहेत.
कोपरीतील मंगळा हायस्कूलजवळ तक्रारदाराचा बांधकाम व्यवसाय सुरू आहे. या ठिकाणी तात्पुरते नवीन वीजमीटर बसवून देण्यासाठी शिवकर आणि साळवी यांनी तक्रारदाराकडे लाचेची मागणी केली होती. याबाबत २४ ऑगस्ट रोजी तक्रारदाराने एसीबीकडे तक्रार केली. तक्रारीची पडताळणी केल्यानंतर लाचेची मागणी झाल्याचे स्पष्ट झाले.
त्यानंतर एसीबीच्या पथकाने काशी आई मंदिर चौक परिसरात सापळा रचला. तक्रारदाराच्या मोटारीत शिवकर याने एक लाख २५ हजार रुपयांची लाच स्वीकारली. त्यानंतर त्याने नोटांचे एक बंडल मागील सीटवर बसलेल्या साळवीकडे मोजण्यासाठी दिले. याचवेळी एसीबीच्या पथकाने दोघांना ताब्यात घेतले.