पालघर : एका अज्ञात मानसिक रुग्णांकडून बोईसर जवळील तारापूर पोलीस ठाण्याच्या हद्दीत, कुडण येथील रहिवासी असलेले भीमराव पाटील (७२) व मुकुंद पाटील (८०) या दोन वयोवृद्ध व्यक्तींची डोक्यात वार करून निर्घृण हत्या केल्याची घटना गुरुवारी घडली. या हत्याकांडातील आरोपी कुडण गावाच्या जवळील पोफरणच्या दलदलीच्या खाजणामध्ये लपून बसला असतानाच पोलिसांनी ताब्यात घेतले आहे. पुढील अधिक तपास सुरू असून, कोणत्याही अफवांवर विश्वास ठेवू नये, असे आवाहन पोलीस अधीक्षक बाळासाहेब पाटील यांनी केले आहे.

सदरचा माथेफिरू इसम दोन दिवसांपासून वेड्याप्रमाणे परिसरात कुऱ्हाडसदृश हत्यारासह वावरत असल्याची माहिती समोर येत असून हत्या केल्यानंतर हा इसम जवळच्याच झाडी झुडपातून पळाला असल्याचे प्रत्यक्षदर्शींनी सांगितले. दरम्यान तारापूर पोलीस घटनास्थळी दाखल झाले आणि आरोपीचा शोध घेत पुढील तपास व कार्यवाही करत आहेत. या आरोपीस तारापूर पोलीस ठाण्यात आणण्यात आले आहे. आरोपी सध्या इतर काहीही माहिती देत नसल्याचे समजते.