संध्याकाळच्या चहासोबत काहीतरी चटपटीत खायचं असेल तर कोथिंबीर वडी हा उत्तम पर्याय आहे. ताजी कोथिंबीर, बेसन आणि काही साधे मसाले वापरून ही वडी सहज बनवता येते. विशेष म्हणजे वडी छान कुरकुरीत होण्यासाठी नेहमी एकाच पद्धतीने करण्याची गरज नाही. वाफवून आणि नंतर परतून किंवा थेट पॅनमध्ये मिश्रण परतून, अशा दोन पद्धतींनी तुम्ही चविष्ट कोथिंबीर वडी तयार करू शकता.
कोथिंबीर वडीसाठी पीठ घट्टसर ठेवा
सुरुवातीला कोथिंबीर स्वच्छ धुऊन बारीक चिरून घ्या. एका भांड्यात चिरलेली कोथिंबीर, बेसन, तिखट, हळद, धणे-जिरेपूड, तीळ आणि चवीनुसार मीठ घाला. हे सर्व व्यवस्थित एकत्र करा.
आता त्यात थोडे थोडे पाणी घालत घट्टसर पीठ मळून घ्या. पीठ खूप सैल ठेवू नका. घट्ट पीठ असल्यास त्याला सहज आकार देता येतो आणि वडी तयार करतानाही ती तुटत नाही.
पद्धत १ : आधी वाफवा, मग परतून घ्या
तयार मिश्रणाचे मध्यम आकाराचे रोल तयार करा. दरम्यान स्टीमर किंवा कुकरमध्ये पाणी गरम होण्यासाठी ठेवा. पाणी उकळल्यानंतर हे रोल वाफवून घ्या.
वडी पूर्णपणे वाफवल्यानंतर लगेच कापू नका. काही वेळ थंड होऊ द्या. गार झाल्यावर त्याचे समान आकाराचे तुकडे करा.
आता कढईत थोडे तेल गरम करून मोहरी, तीळ आणि कडीपत्त्याची फोडणी द्या. त्यात कापलेल्या वड्या घालून मध्यम आचेवर दोन्ही बाजूंनी परतून घ्या. वड्यांना छान सोनेरी रंग आला की त्या कुरकुरीत होतात.
पद्धत २ : वाफवायची गरज नाही, पॅनमध्येच करा
वेळ कमी असेल तर दुसरी पद्धत वापरून पाहा. यासाठी तयार केलेले कोथिंबिरीचे मिश्रण थेट पॅनमध्ये घ्या.
मध्यम आचेवर हे मिश्रण सतत हलवत परता. मिश्रणातील पाणी आटत जाईल आणि ते हळूहळू घट्ट होईल. मिश्रण व्यवस्थित आटून एकजीव झाले की ते एका ताटात किंवा ट्रेमध्ये काढा.
थोडे गार झाल्यावर हाताने किंवा चमच्याच्या मदतीने त्याला चौकोनी आकार द्या. हे मिश्रण पूर्णपणे थंड होण्यासाठी काही वेळ फ्रिजमध्ये ठेवा. सेट झाल्यावर त्याच्या वड्या कापून घ्या.
कढईत थोडे तेल गरम करून या वड्या दोन्ही बाजूंनी परतून घ्या. यामुळे वड्या बाहेरून कुरकुरीत आणि आतून मऊ राहतील.
कुरकुरीत वडीसाठी या टिप्स लक्षात ठेवा
कोथिंबीर धुतल्यानंतर तिच्यातील अतिरिक्त पाणी निथळून घ्या.
पीठात पाणी एकदम न घालता गरजेनुसार थोडे थोडे घाला.
वाफवताना मोठा जाड रोल करण्याऐवजी दोन मध्यम आकाराचे रोल करा.
वाफवलेल्या वड्या पूर्ण गार झाल्यानंतरच कापा.
वड्या परतताना आच मध्यम ठेवा, त्यामुळे त्या बाहेरून कुरकुरीत होतात.
पॅनमध्ये मिश्रण करताना त्यातील पाणी पूर्णपणे आटू द्या.
गरमागरम कुरकुरीत कोथिंबीर वडीसोबत हिरवी चटणी किंवा चहा असेल तर नाश्त्याची मजा आणखी वाढते. त्यामुळे घरात कोथिंबीर आणि बेसन असेल, तर या दोनपैकी सोपी वाटणारी पद्धत आजच करून पाहा.
