दररोज रात्री जेवणासाठी काय बनवायचे, हा प्रश्न अनेक गृहिणींना पडतो. रोजच्या भाजी-पोळीला कंटाळा आला असेल आणि काहीतरी झटपट, चविष्ट तसेच पौष्टिक खायचे असेल, तर सोया पुलाव हा उत्तम पर्याय ठरू शकतो. प्रथिनांनी भरपूर असलेले सोया चंक्स आणि सुगंधी बासमती तांदळाचा संगम या पदार्थाला खास बनवतो.
सोया चंक्समध्ये प्रथिने, फायबर, लोह आणि शरीरासाठी आवश्यक अनेक पोषक घटक मुबलक प्रमाणात असतात. त्यामुळे हा पुलाव केवळ चव वाढवत नाही, तर आरोग्यालाही फायदेशीर ठरतो. दुपारच्या डब्यासाठी, रात्रीच्या जेवणासाठी किंवा पाहुण्यांसाठीही हा पदार्थ सहज तयार करता येतो. दही, रायता किंवा कोशिंबिरीसोबत त्याची चव आणखी खुलते.
साहित्य
१ कप बासमती तांदूळ
१ कप सोया चंक्स
१ मोठा कांदा (पातळ चिरलेला)
१ टोमॅटो (बारीक चिरलेला)
१ हिरवी मिरची
१ टीस्पून आले-लसूण पेस्ट
२ टेबलस्पून तेल किंवा तूप
१ तमालपत्र
१ दालचिनी तुकडा
२ लवंगा
२ वेलची
½ टीस्पून हळद
१ टीस्पून गरम मसाला
चवीनुसार मीठ
२ कप पाणी
कोथिंबीर
कृती
सर्वप्रथम तांदूळ स्वच्छ धुवून सुमारे २० मिनिटे भिजत ठेवा. त्याचवेळी सोया चंक्स गरम पाण्यात १० मिनिटे भिजवून त्यातील अतिरिक्त पाणी काढून घ्या.
आता कुकर किंवा जाड लेअरच्या भांड्यात तेल किंवा तूप गरम करा. त्यात तमालपत्र, दालचिनी, लवंगा आणि वेलची घालून काही सेकंद परता. त्यानंतर कांदा घालून तो सोनेरी रंग येईपर्यंत परतून घ्या.
यानंतर आले-लसूण पेस्ट आणि हिरवी मिरची घालून एक मिनिट परता. त्यात टोमॅटो, हळद आणि मीठ घालून टोमॅटो मऊ होईपर्यंत शिजवा. आता सोया चंक्स आणि गरम मसाला घालून मिश्रण नीट एकजीव करा.
भिजवलेले तांदूळ घालून हलक्या हाताने परता आणि त्यात दोन कप पाणी घाला. उकळी आल्यानंतर कुकरमध्ये दोन शिट्ट्या होईपर्यंत किंवा भांड्यात तांदूळ पूर्ण शिजेपर्यंत शिजवा.
तयार पुलावावर ताजी कोथिंबीर भुरभुरवा आणि दही, रायता किंवा पापडासोबत गरमागरम सर्व्ह करा.
