हिवाळा आला की त्वचा कोरडी, निस्तेज दिसू लागते. थंडी, कमी घाम, गरम पाण्याच्या आंघोळी यामुळे त्वचेचा नैसर्गिक ओलावा कमी होतो. अशा वेळी महागड्या क्रीम्स किंवा केमिकलयुक्त फेशियलपेक्षा आपल्या स्वयंपाकघरातली हळद हा सर्वात सुरक्षित आणि प्रभावी उपाय ठरतो. हजारो वर्षांपासून भारतीय सौंदर्यपरंपरेत हळदीच्या उटण्याला अनन्यसाधारण महत्त्व आहे.
हळद - सौंदर्य आणि आरोग्याचं नैसर्गिक वरदान
हळदीमध्ये अँटीऑक्सिडंट्स, अँटीबॅक्टेरियल आणि अँटीइन्फ्लेमेटरी गुणधर्म असतात. त्यामुळे त्वचेवरील जंतुसंसर्ग कमी होतो, पिंपल्स आणि डागांवर नियंत्रण राहते आणि त्वचेला नैसर्गिक चमक मिळते.
हळद त्वचेतलं रक्ताभिसरण सुधारते, त्यामुळे चेहऱ्यावर आरोग्यदायी तेज येतं. नियमित वापर केल्यास टॅनिंग कमी होतं, त्वचा मऊ-सुंदर होते.
हिवाळ्यात हळदीचं उटणं का फायदेशीर?
हिवाळ्यात त्वचा जास्त कोरडी होते. हळदीचं उटणं त्वचेला नैसर्गिक पोषण देतं. ते त्वचेतील मृत पेशी काढून टाकतं आणि त्वचेला आतून ओलावा मिळवून देतं. विशेषतः आठवड्यातून २-३ वेळा उटणं लावल्यास त्वचा अधिक हेल्दी आणि ग्लोइंग दिसू लागते.
हळदीचं उटणं कोणासाठी उपयुक्त?
कोरडी आणि निस्तेज त्वचा
पिंपल्स, ब्लॅकहेड्सची समस्या
टॅनिंग किंवा असमान स्किन टोन
नैसर्गिक तेज हवं असलेल्यांसाठी
हे उटणं महिलांप्रमाणेच पुरुषांसाठीही तितकंच फायदेशीर आहे.
घरच्या घरी हळदीचं उटणं कसं बनवायचं?
साहित्य:
१ चमचा हळद
२ चमचे बेसन
१ चमचा दुधाची साय किंवा कच्चं दूध
अर्धा चमचा मध (कोरड्या त्वचेसाठी)
काही थेंब गुलाबपाणी (ऐच्छिक)
कृती:
हळदीचे उटणे बनवण्यासाठी एका वाटीत एक चमचा हळद आणि दोन चमचे बेसन घ्यावे. त्यात एक चमचा कच्चे दूध किंवा दुधाची साय घालून मिश्रण नीट एकजीव करावे. त्वचा खूप कोरडी असल्यास अर्धा चमचा मध घालावा आणि पेस्ट खूप घट्ट वाटत असेल तर काही थेंब गुलाबपाणी मिसळावे. तयार झालेली पेस्ट स्वच्छ चेहरा आणि मानेवर समप्रमाणात लावावी. साधारण १० ते १५ मिनिटे उटणं तसेच ठेवावे. उटणं अर्धवट सुकल्यावर हलक्या हाताने गोलाकार हालचाली करत पाण्याने चेहरा धुवावा. या प्रक्रियेमुळे त्वचेवरील मृत पेशी निघून जातात, त्वचा स्वच्छ होते आणि नैसर्गिक तेज दिसू लागते.
वापरताना घ्यायची काळजी:
आठवड्यातून २-३ वेळाच वापरा
संवेदनशील त्वचा असल्यास आधी पॅच टेस्ट करा
उटणं चोळताना जास्त दाब देऊ नका
नैसर्गिक सौंदर्याचं गुपित
हळदीचं उटणं नियमित वापरल्यास महागड्या पार्लर ट्रीटमेंटची गरज भासत नाही. थोडा वेळ, थोडं संयम आणि नैसर्गिक घटक यांच्यामुळे त्वचा आतून उजळते. हिवाळ्यात त्वचेला जपायचं असेल, तर हळदीचं उटणं हा सर्वात सोपा, सुरक्षित आणि परिणामकारक उपाय नक्कीच ठरेल.
(Disclaimer: या लेखात दिलेली माहिती सामान्य मार्गदर्शनासाठी आहेत. याची ‘नवशक्ति’ पुष्टी करत नाही.)
