मुंबई : हॉटेल किंवा रेस्टॉरंटमध्ये जेवताना खराब, भेसळयुक्त किंवा मुदतबाह्य अन्न मिळालं तर अनेकजण नाराजी व्यक्त करून तेवढ्यावरच थांबतात. मात्र, अशा प्रकारांकडे दुर्लक्ष न करता आता तुम्ही काही मिनिटांत थेट FSSAI कडे ऑनलाइन तक्रार नोंदवू शकता. 'फूड सेफ्टी कनेक्ट' ॲपच्या माध्यमातून फोटो, व्हिडीओ आणि ठिकाणाची माहिती अपलोड करून तक्रार दाखल करण्याची सोपी सुविधा उपलब्ध असून, त्याची संपूर्ण स्टेप-बाय-स्टेप प्रक्रिया जाणून घ्या.
अन्नसुरक्षेसाठी नागरिकांच्या सहभागावर भर
FSSAI ही आरोग्य आणि कुटुंब कल्याण मंत्रालयाच्या अखत्यारीतील वैधानिक संस्था असून, देशातील अन्नपदार्थांचे उत्पादन, साठवण, वितरण, विक्री आणि आयात यांचे नियमन करते. अन्नसुरक्षेची मानके निश्चित करण्यासोबतच नागरिकांचा सहभाग वाढवण्यासाठी 'फूड सेफ्टी कनेक्ट' ॲप विकसित करण्यात आले आहे.
कोणत्या प्रकारच्या तक्रारी करता येतील?
अन्नातील भेसळ
मुदतबाह्य अन्नपदार्थांची विक्री
अस्वच्छ स्वयंपाकघर किंवा खाद्य व्यवसाय
चुकीचे किंवा दिशाभूल करणारे लेबल
अन्नसुरक्षा नियमांचे उल्लंघन
तक्रारीसोबत फोटो, व्हिडीओ आणि लोकेशनची माहितीही जोडता येते.
'फूड सेफ्टी कनेक्ट' ॲपद्वारे तक्रार कशी कराल?
स्टेप १ : Google Play Store किंवा Apple App Store वरून Food Safety Connect ॲप डाउनलोड करा किंवा FOSCOS पोर्टलला भेट द्या.
स्टेप २ : नोंदणी करून लॉग-इन करा आणि 'Add Complaint' पर्याय निवडा.
स्टेप ३ : त्यानंतर Category पर्यायावर क्लिक करून ज्याबद्दल तक्रार करायची आहे तो पर्याय निवडा.
स्टेप ४ : संबंधित हॉटेल, रेस्टॉरंट किंवा दुकानाचे नाव, पत्ता आणि उपलब्ध असल्यास FSSAI परवाना क्रमांक भरा. QR कोड असल्यास तो स्कॅन करा.
स्टेप ५ : तक्रारीचे कारण निवडा - भेसळ, अस्वच्छता, मुदतबाह्य पदार्थ, चुकीचे लेबलिंग किंवा इतर.
स्टेप ६ : पुरावा म्हणून फोटो, व्हिडीओ किंवा कागदपत्रे अपलोड करा.
स्टेप ७ : तक्रार सबमिट करा. त्यानंतर तुम्हाला एक ट्रॅकिंग आयडी मिळेल.
स्टेप ८ : या आयडीद्वारे तक्रारीची सद्यस्थिती ॲपवर पाहता येईल.
स्टेप ९ : तक्रारीवर समाधानकारक कारवाई झाली नाही, तर 'Re-raise Complaint' पर्याय वापरून ती पुढील स्तरावर पाठवता येईल.
FBO परवान्याचीही करता येणार पडताळणी
या ॲपच्या माध्यमातून संबंधित खाद्य व्यवसाय FSSAI कडे नोंदणीकृत किंवा परवानाधारक आहे की नाही, याचीही माहिती मिळते. तसेच अन्नसुरक्षेशी संबंधित मार्गदर्शक सूचना आणि जनजागृतीपर माहितीही नागरिकांना उपलब्ध करून देण्यात आली आहे.
अलीकडेच घेतले महत्त्वाचे निर्णय
FSSAI ने अलीकडेच वर्तमानपत्रात अन्नपदार्थ गुंडाळून देण्यास मनाई केली होती. तसेच शाकाहारी (व्हेगन) अन्नपदार्थांवर अनिवार्य 'V' चिन्ह वापरण्यासाठी जुलै २०२७ पर्यंतची मुदत निश्चित केली आहे.
Swiggy Instamart ला ९ नोटिसा
ग्राहकांकडून मुदतबाह्य, खराब आणि दूषित अन्नपदार्थांच्या वितरणाबाबत तक्रारी आल्यानंतर FSSAI ने Swiggy Instamart ला ९ नोटिसा बजावल्या आहेत. अन्नसुरक्षा, साठवण व्यवस्था आणि विक्रेत्यांच्या पडताळणी प्रक्रियेबाबत सविस्तर अहवाल सादर करण्याचे निर्देशही देण्यात आले आहेत.
