नवी दिल्ली : अनेक यशस्वी चित्रपटांच्या प्रदर्शनामुळे मिळालेल्या सकारात्मक गतीमुळे २०२६ च्या पहिल्या सहामाहीत भारतीय मल्टीप्लेक्समधील बॉक्स ऑफिस कमाईत वार्षिक आधारावर २१ टक्क्यांची वाढ झाली आहे, अशी माहिती मल्टिप्लेक्स असोसिएशन ऑफ इंडियाने गुरुवारी दिली.
मल्टीप्लेक्स असोसिएशन ऑफ इंडियाने एका निवेदनात म्हटले आहे की, ही दुहेरी अंकांमधील वाढ चित्रपटगृहातील अनुभवाची निरंतर ताकद आणि सिनेमावरील प्रेक्षकांचा कायम असलेला विश्वास दर्शवते. विविध भाषांमधील आणि वेगवेगळ्या प्रकारच्या उत्कृष्ट चित्रपटांमुळे हे शक्य झाले आहे.
हिंदी, प्रादेशिक आणि आंतरराष्ट्रीय चित्रपटांच्या यशामुळे तसेच महानगरांसह द्वितीय आणि तृतीय श्रेणीतील शहरांमध्ये प्रेक्षकांच्या मिळालेल्या सातत्यपूर्ण प्रतिसादामुळे ही वाढ झाली आहे. ही संघटना देशातील ११ सिनेमा साखळ्यांचे प्रतिनिधित्व करते त्याअंतर्गत ३,००० हून अधिक पडद्यांसह ५५० पेक्षा जास्त मल्टीप्लेक्स चालवले जातात.
पहिल्या सहामाहीतील कमाईतील वाढ : २१ टक्के
एकूण प्रतिनिधित्व करणारी सिनेमा साखळी : ११
देशातील एकूण मल्टीप्लेक्स : ५५० पेक्षा अधिक
एकूण पडद्यांची संख्या : ३,००० हून अधिक
जनसंपर्क उद्योग ४,५०० कोटींवर जाणार
नवी दिल्ली : भारतीय जनसंपर्क उद्योग २०३० पर्यंत ४,५०० कोटी रुपयांवर पोहोचण्याची शक्यता आहे. आर्थिक वर्ष २०२६ मध्ये ११ टक्के वाढीसह या उद्योगाने ३,२३० कोटी रुपयांचा टप्पा गाठला आहे, असे याबाबतच्या एका अहवालात नमूद करण्यात आले आहे.
पब्लिक रिलेशन्स कन्सल्टंट्स असोसिएशन ऑफ इंडियाच्या स्प्रिंट २०२६ अहवालानुसार, आर्थिक वर्ष २०२६ मधील ११ टक्के वाढीचा दर हा गेल्या दशकभरातील १२ टक्के चक्रवाढ वार्षिक वाढीच्या दरापेक्षा थोडा कमी आहे. हे या उद्योगाच्या परिपक्वतेचे संकेत आहेत.
गुरुवारी प्रसिद्ध झालेल्या या अहवालात नमूद केले आहे की, आर्थिक वर्ष २०२६ मध्ये आशिया-पॅसिफिक बाजारपेठेत भारतीय जनसंपर्क उद्योगाचा वाटा १२.६ टक्के होता.
आर्थिक वर्ष २०२६ मधील महसूल : ३,२३० कोटी रुपये
२०३० पर्यंतचा अंदाजित महसूल : ४,५०० कोटी रुपये
आर्थिक वर्ष २०२६ मधील वाढ : ११ टक्के
आशिया-पॅसिफिक बाजारहिस्सा : १२.६ टक्के