चीनमधील कोळशाच्या खाणीत स्फोट; ८२ कामगारांचा मृत्यू, बचावकार्य सुरू (Photo - FPJ)
आंतरराष्ट्रीय

चीनमधील कोळशाच्या खाणीत स्फोट; ८२ कामगारांचा मृत्यू, बचावकार्य सुरू

उत्तर चीनमधील शान्शी प्रांतात एका कोळशाच्या खाणीत झालेल्या भीषण गॅस स्फोटात ८२ जणांचा मृत्यू झाला आहे, तर अनेक जण जखमी झाले आहेत.

Swapnil S

बीजिंग : उत्तर चीनमधील शान्शी प्रांतात एका कोळशाच्या खाणीत झालेल्या भीषण गॅस स्फोटात ८२ जणांचा मृत्यू झाला आहे, तर अनेक जण जखमी झाले आहेत. सरकारी माध्यमांनी दिलेल्या वृत्तानुसार, शुक्रवारी संध्याकाळी ७:२९ वाजता 'लियुशेन्यू' कोळशाच्या खाणीत हा अपघात झाला.

शान्शी प्रांतातील किनयुआन परगण्यामध्ये झालेल्या या दुर्घटनेत आतापर्यंत ८२ जणांचे मृतदेह हाती आले असून, अद्याप ९ कामगार खाणीत अडकले असल्याची भीती व्यक्त केली जात आहे. युद्धपातळीवर बचावकार्य सुरू असून अडकलेल्यांना सुखरूप बाहेर काढण्याचे शर्थीचे प्रयत्न केले जात आहेत.

या भीषण अपघातानंतर चीनचे राष्ट्राध्यक्ष शी जिनपिंग यांनी आदेश जारी करत जखमींवर योग्य उपचार आणि सर्वसमावेशक बचाव मोहीम राबवण्याचे निर्देश दिले आहेत. या दुर्घटनेची सखोल चौकशी करून दोषींवर कायद्यानुसार कारवाई करण्यात येईल, असेही त्यांनी स्पष्ट केले. देशभरातील सर्व प्रशासकीय यंत्रणांनी या अपघातातून धडा घेण्याची गरज आहे.

पुराबाबतही इशारा

चीनमध्ये सध्या पुराचा मोसम सुरू होत असल्याने, राष्ट्राध्यक्षांनी आपत्कालीन सज्जता मजबूत करण्याचे आणि पूर नियंत्रण उपाययोजना अधिक कडक करण्याचे आदेश दिले आहेत. नागरिकांचे प्राण आणि मालमत्ता सुरक्षित ठेवण्याला प्रशासनाने प्राधान्य द्यावे, असे त्यांनी म्हटले आहे. दरम्यान, परिस्थितीचे गांभीर्य लक्षात घेऊन चीनचे उपपंतप्रधान झांग गुओकिंग हे एका विशेष पथकासह घटनास्थळी रवाना झाले असून, ते स्वतः बचावकार्यावर आणि मदतकार्यावर देखरेख ठेवून आहेत.

Thane : ३२ मीटर शिडीच्या देखभालीवर ५.८५ कोटींचा खर्च; तीन वर्षांच्या दुरुस्तीचा प्रस्ताव, नव्या निविदेपर्यंत सहा महिन्यांची मुदतवाढ

Mumbai : ४० वर्षांपासून एकट्याच राहत होत्या; वृद्धेच्या निधनानंतर शेजाऱ्यांनी केले अंत्यसंस्कार, मुलींना शोधण्यासाठी वृत्तपत्रात जाहिरात

Mumbai : मोनोरेल यंदाही यार्डातच; सुरक्षेबाबत MMRDA सावध

SpiceJet च्या अडचणीत वाढ; विमान रद्द केल्याप्रकरणी DGCA चा दणका, नियमभंगाच्या आरोपांवर नोटीस जारी

Mumbai : औषधांसाठी हवेत १२०० कोटी, मिळतात ३०० कोटी; पालिका रुग्णालयांत औषधांचा तुटवडा, नगरसेवकांनी BMC ला धारेवर धरले