बोईस : पश्चिम आयडाहोमधील 'माऊंटेन होम एअर फोर्स बेस'वर रविवारी एका हवाई शोदरम्यान नौदलाच्या दोन विमानांची हवेत भीषण धडक झाली. या अपघातानंतर दोन्ही विमानांमधील सर्व ४ क्रू मेंबर्स सुरक्षितपणे बाहेर पडले, अशी माहिती अधिकृत सूत्रांनी दिली.

अमेरिकेच्या नौदल हवाई दलाच्या प्रवक्त्यांनी सांगितले की, वॉशिंग्टनच्या व्हिडबे आयलंड येथील 'इलेक्ट्रॉनिक अटॅक स्क्वाड्रन १२९' मधील दोन 'यूएस नेव्ही ईए१८-जी ग्रोवलर्स' विमानांचा यामध्ये समावेश होता. ही विमाने हवाई कसरतींचे प्रात्यक्षिक दाखवत असताना हा अपघात घडला. दोन्ही विमानांतील चारही क्रू मेंबर्स सुरक्षितपणे बाहेर पडले असून त्यांची प्रकृती स्थिर आहे. या अपघातानंतर एअर फोर्स बेस ताबडतोब लॉकडाऊन करण्यात आला आणि उर्वरित हवाई शो रद्द करण्यात आला, अशी माहिती बेस प्रशासनाने सोशल मीडिया पोस्टद्वारे दिली आहे.

बोईसच्या दक्षिणेस सुमारे ८० किलोमीटर अंतरावर असलेल्या तळाजवळ विमाने जमिनीवर कोसळत असताना आकाशात ४ पॅराशूट उघडल्याचे प्रत्यक्षदर्शींनी पोस्ट केलेल्या व्हिडीओंमध्ये दिसत आहे. दोन्ही विमानांचे क्रू मेंबर्स सुरक्षित बाहेर पडणे ही उल्लेखनीय बाब आहे. हवेत धडक झाल्यानंतरही विमाने एकमेकांना अडकून राहिल्यामुळे कदाचित हे शक्य झाले असावे, कारण सहसा अशा अपघातांत बाहेर पडण्याची संधी मिळत नाही.