पावसाळ्यात गरमागरम आणि मसालेदार पदार्थ खाण्याची इच्छा अनेकांना होते. मात्र बाहेरचे पदार्थ खाण्यापेक्षा घरच्या घरी स्वच्छ आणि चविष्ट पदार्थ तयार करणे केव्हाही उत्तम. अशावेळी हॉटेलस्टाइल व्हेज पुलाव हा झटपट बनणारा आणि सगळ्यांनाच आवडणारा पर्याय ठरू शकतो.
मोजक्या साहित्यामध्ये आणि अवघ्या १५ मिनिटांत तयार होणारा हा पुलाव रात्रीच्या जेवणासाठी किंवा विकेंड स्पेशल मेनूसाठी अगदी योग्य आहे. योग्य मसाल्यांचा वापर केल्यास घरच्या घरीही स्ट्रीटफूडसारखी चव अनुभवता येते.
साहित्य
२ कप बासमती तांदूळ
२ टेबलस्पून तेल
१ टेबलस्पून बटर
१ कांदा (बारीक चिरलेला)
१ सिमला मिरची (बारीक चिरलेली)
१ टोमॅटो (बारीक चिरलेला)
१ तेजपान
१ टीस्पून आलं-लसूण-मिरची पेस्ट
१ टीस्पून पुलाव मसाला किंवा बिर्याणी मसाला
½ टीस्पून गरम मसाला
चवीनुसार मीठ
१ टीस्पून लिंबाचा रस
कृती
सर्वप्रथम बासमती तांदूळ स्वच्छ धुवून सुमारे ३० मिनिटे भिजत ठेवा. त्यानंतर पाण्यात थोडे मीठ, लिंबाचा रस आणि काही थेंब तेल घालून तांदूळ मोकळा शिजवून घ्या.
दुसरीकडे कढईमध्ये तेल गरम करून त्यात तेजपान आणि चिरलेला कांदा सोनेरी होईपर्यंत परता. त्यानंतर आलं-लसूण-मिरचीची पेस्ट घालून काही सेकंद परता.
आता सिमला मिरची आणि टोमॅटो घालून ते मऊ होईपर्यंत शिजवा. त्यामध्ये बटर, पुलाव मसाला आणि गरम मसाला घालून सर्व मसाले एकजीव होऊ द्या.
यानंतर तयार मसाल्यात शिजवलेला भात घाला आणि हलक्या हाताने मिसळा. कढईवर झाकण ठेवून २ ते ३ मिनिटे वाफ येऊ द्या.
गरमागरम, सुगंधी आणि मसालेदार व्हेज पुलाव रायता, पापड किंवा लोणच्यासोबत सर्व्ह करा.
पुलाव अधिक चविष्ट बनवण्यासाठी टिप्स
शक्यतो बासमती तांदूळ वापरा, त्यामुळे पुलाव अधिक सुगंधी आणि मोकळा होतो.
आवडीनुसार मटार, गाजर, फरसबी किंवा स्वीट कॉर्न घालू शकता.
शेवटी थोडे तूप किंवा बटर घातल्यास चव अधिक खुलते.
कोथिंबीर आणि तळलेला कांदा घालून सजवल्यास पुलाव आकर्षक दिसतो.