रोजच्या जेवणात एखादी चवदार चटणी असेल तर साधंसुधं जेवणही रुचकर वाटतं. विशेष म्हणजे चटणी ही केवळ चव वाढवणारी नसून शरीराला आवश्यक पोषक घटकही पुरवते. कडिपत्ता, उडीद डाळ आणि चणा डाळ यांचा वापर करून तयार होणारी ही सुकी चटणी चवदार तर आहेच, शिवाय आरोग्यासाठीही फायदेशीर ठरू शकते. एकदा करून ठेवली की ही चटणी जवळपास १५ दिवस टिकते.
साहित्य
२ वाट्या कडिपत्त्याची पाने
३ चमचे उडीद डाळ
२ चमचे चणा डाळ
१० ते १२ सुक्या लाल मिरच्या
१ टीस्पून जिरे
१ टीस्पून धने
थोडी चिंच
१० ते १२ लसूण पाकळ्या
चवीनुसार मीठ
कृती
सुरुवातीला कढई गरम करून त्यात उडीद डाळ आणि चणा डाळ मंद आचेवर छान भाजून घ्या. डाळी हलक्या लालसर झाल्यावर बाजूला काढा. त्याच कढईत सुक्या लाल मिरच्या परतून घ्या. त्यानंतर जिरे आणि धने घालून भाजा.
आता स्वच्छ धुवून पूर्ण कोरडी केलेली कडिपत्त्याची पाने कढईत घालून परता. सर्व साहित्य थंड झाल्यानंतर मिक्सरच्या भांड्यात घाला. त्यात चिंच, लसूण पाकळ्या आणि मीठ घालून मिश्रण बारीक वाटून घ्या. तयार चटणी हवाबंद डब्यात भरून ठेवा.
कडिपत्ता आरोग्यासाठी का फायदेशीर?
कडिपत्त्यामध्ये लोह, कॅल्शियम, फायबर आणि अँटिऑक्सिडंट्स भरपूर प्रमाणात असतात. त्यामुळे केसांच्या आरोग्यासाठी, हाडांच्या मजबुतीसाठी आणि पचनक्रिया सुधारण्यासाठी तो उपयुक्त मानला जातो. रोजच्या आहारात कडिपत्त्याचा समावेश केल्यास शरीराला अनेक आवश्यक पोषक घटक मिळू शकतात.
डाळींचाही मिळतो अतिरिक्त फायदा
या चटणीत वापरलेल्या उडीद डाळ आणि चणा डाळ प्रथिनांचे चांगले स्रोत मानले जातात. त्यामुळे ही चटणी केवळ चव वाढवत नाही, तर शरीराला ऊर्जा आणि पोषणही देते. भाकरी, पोळी, वरण-भात किंवा तुपासोबतही ही चटणी खाता येते.
साठवणूक कशी करावी?
चटणी पूर्णपणे थंड झाल्यानंतरच डब्यात भरावी. फ्रिजमध्ये ठेवली तर ही चटणी सुमारे १५ दिवस चांगली टिकू शकते. त्यामुळे व्यस्त दिनक्रमात झटपट खाण्यासाठी हा एक उत्तम पर्याय ठरू शकतो.