लहानपणी शाळेबाहेर मिळणारी खट्टी-मीठी चिंचेची गोळी आजही अनेकांच्या जिभेवर रेंगाळते. आंबट, गोड आणि तिखट चवीचा भन्नाट संगम असलेली ही चिंचेची कँडी आता घरच्या घरी अगदी सोप्या पद्धतीने तयार करता येते. विशेष म्हणजे उन्हाळ्यात किंवा पावसाळ्यात चटकदार काहीतरी खाण्याची इच्छा झाली तर ही रेसिपी उत्तम पर्याय ठरू शकते. कमी साहित्य, कमी खर्च आणि झटपट तयार होणारी ही इमली कँडी लहानांपासून मोठ्यांपर्यंत सर्वांनाच आवडेल.
साहित्य
२५० ग्रॅम चिंच
३ कप पाणी
१५० ग्रॅम गूळ
१ टीस्पून मीठ
१ टीस्पून काळं मीठ
२ टेबलस्पून लाल तिखट
२ टेबलस्पून भाजलेली जिरेपूड
कँडीसाठी स्टिक किंवा चमचा
कृती :
सर्वप्रथम चिंचेचे कवच काढून ती गरम पाण्यात मऊ होईपर्यंत उकळून घ्या. चिंच पूर्ण मऊ झाल्यावर गाळणीच्या मदतीने तिचा गर काढून बिया वेगळ्या करा.
आता या गरात गूळ, मीठ आणि काळं मीठ घालून मध्यम आचेवर शिजवायला ठेवा. मिश्रण सतत हलवत राहा. साधारण ३० मिनिटांनी हे मिश्रण घट्ट होऊन पॅनच्या कडा सोडू लागेल.
मिश्रण थोडं थंड झाल्यावर हाताला हलकं तेल लावून स्टिकवर किंवा छोट्या गोळ्यांच्या आकारात कँडी तयार करा. तयार कँडीवर भाजलेली जिरेपूड किंवा लाल तिखट भुरभुरा. तयार आहे चटकदार, खट्टी-मीठी आणि झणझणीत चिंचेची होममेड कँडी.
टिप्स :
कँडी अधिक चविष्ट हवी असल्यास थोडी चाट मसाला पावडर घालू शकता.
मिश्रण जास्त पातळ राहिल्यास कँडी सेट होणार नाही, त्यामुळे ते व्यवस्थित घट्ट होईपर्यंत शिजवा.
एअरटाइट डब्यात ठेवल्यास या कँडी ८ ते १० दिवस सहज टिकतात.
मुलांसाठी बनवत असाल तर तिखटाचे प्रमाण कमी ठेवा.