त्वचा तजेलदार आणि फ्रेश दिसावी यासाठी अनेकजण महागडी स्किनकेअर उत्पादने, फेशियल किंवा ब्युटी ट्रीटमेंट्सचा आधार घेतात. मात्र काही वेळा एवढा खर्च करूनही अपेक्षित परिणाम दिसून येत नाही. अशा वेळी घरात सहज उपलब्ध असलेल्या वस्तूंचा वापर करूनही त्वचेची काळजी घेता येऊ शकते.
त्यापैकीच एक लोकप्रिय उपाय म्हणजे ‘स्पून मसाज’. फक्त दोन चमचे आणि काही मिनिटांचा वेळ वापरून चेहऱ्यावरील सूज कमी करण्यास, त्वचेला ताजेपणा देण्यास आणि रक्ताभिसरण सुधारण्यास मदत होऊ शकते.
स्पून मसाज कसा करायचा?
हा उपाय करण्यासाठी दोन स्वच्छ धातूचे चमचे घ्या. रात्री झोपण्यापूर्वी ते काही तास फ्रिजमध्ये किंवा फ्रीजरमध्ये ठेवावेत. सकाळी हे थंडगार चमचे चेहऱ्यावर हलक्या हाताने फिरवून मसाज करावा.
सुरुवातीला काही सेकंद डोळ्यांवर चमचे ठेवावेत. यामुळे डोळ्यांभोवतीचा थकवा आणि सूज कमी होण्यास मदत मिळू शकते. त्यानंतर गाल, कपाळ, हनुवटी, जॉ-लाइन आणि नाकाच्या बाजूने वरच्या दिशेने मसाज करावा.
त्वचेला होऊ शकणारे फायदे
चेहऱ्यावरील सूज कमी होण्यास मदत -
थंड तापमानामुळे त्वचेतील सूज आणि पफीनेस कमी होण्यास मदत मिळू शकते. विशेषतः डोळ्यांखालील सूज कमी करण्यासाठी हा उपाय लोकप्रिय मानला जातो.
रक्ताभिसरण सुधारते -
हलका मसाज केल्याने त्वचेखालील रक्तप्रवाह सुधारण्यास मदत होऊ शकते. त्यामुळे चेहरा अधिक फ्रेश आणि तजेलदार दिसू शकतो.
त्वचेला मिळतो नैसर्गिक ताजेपणा -
सकाळच्या वेळी काही मिनिटे स्पून मसाज केल्याने त्वचा अधिक जागृत आणि ताजी वाटू शकते. त्यामुळे मेकअपपूर्वीही हा उपाय अनेकजण करतात.
ओपन पोअर्स कमी दिसण्यास मदत -
थंडावा मिळाल्यामुळे त्वचेवरील छिद्रे काही काळासाठी आकुंचन पावतात. यामुळे त्वचा अधिक स्मूथ दिसू शकते.
लक्षात ठेवा...
स्पून मसाज हा त्वचेला तात्पुरता ताजेपणा देणारा उपाय असू शकतो. मात्र गंभीर त्वचारोग, सतत पिंपल्स किंवा इतर समस्या असल्यास त्वचारोगतज्ज्ञांचा सल्ला घेणे आवश्यक आहे. तसेच चमचे अतिशय थंड असल्यास ते त्वचेवर जास्त वेळ ठेवू नयेत.
नियमित स्किनकेअर, पुरेसे पाणी आणि संतुलित आहारासोबत हा साधा उपाय त्वचेला अधिक फ्रेश आणि उजळ दिसण्यास मदत करू शकतो.
(Disclaimer : या लेखातील माहिती ही सर्वसाधारण आरोग्यविषयक माहितीनुसार देण्यात आली आहे.‘नवशक्ति’ या माहितीच्या अचूकता किंवा परिणामकारकतेची हमी देत नाही. कोणताही उपाय करण्यापूर्वी वैद्यकीय तज्ज्ञांचा सल्ला घ्या.)