मुंबई : कर्करोगाचे वाढते प्रमाण व कर्करोग उपचाराचे गांभीर्य विचारात घेता राज्यातील जनतेस सर्वसमावेशक कर्करोग सेवा राज्य शासनाकडून उपलब्ध करून देण्यात येणार आहेत. केंद्र शासनाच्या आरोग्य व कुटुंब कल्याण मंत्रालयाने दिलेल्या सूचनेनुसार ‘आसाम कॅन्सर केअर मॉडेलच्या’ धर्तीवर राज्यात त्रिस्तरीय समग्र कर्करोग उपचार सेवा एल १,एल २, एल ३ उपलब्ध होणार आहेत. एल १ या स्तरामध्ये टाटा स्मारक रुग्णालय कर्करोगासाठी प्रमुख संस्था म्हणून काम करणार आहे. यासाठी १०० कोटींचा निधी विविध माध्यमातून उपलब्ध करण्यात येणार आहे.
राज्यात त्रिस्तरीय समग्र कर्करोग उपचार सेवा उपलब्ध होणार आहेत. एल १ मध्ये टाटा स्मारक रुग्णालय ही कर्करोगाकरिता शिखर संस्था म्हणून काम करणार आहे.
एल २ या स्तरावरती कायमस्वरूपी संपूर्ण कर्करोग शिक्षण व सेवा असेल यामध्ये छत्रपती संभाजीनगर, चंद्रपूर, नागपूर, मुंबई (जे.जे.), कोल्हापूर, पुणे (बैरामजी जिजीभॉय शासकीय महाविद्यालय), नांदेड येथील ७ शासकीय महाविद्यालयांशी संलग्नित रुग्णालये, नाशिक व अमरावती येथील सार्वजनिक आरोग्य विभागाच्या अखत्यारितील दोन संदर्भ सेवा रूग्णालयांचा यामध्ये समावेश आहे. अशी नऊ केंद्रे एल २ मध्ये समाविष्ट आहेत. एल ३ यास्तरामध्ये मध्ये कर्करोग निदान आणि डे-केअर रेडिओथेरिपी व किमोथेरिपी युनिटस यामध्ये कार्यरत असणार आहेत. एल ३ स्तरावरील कर्करोग रुग्णालयांचे बांधकाम शासनामार्फत होऊन ही रुग्णालये सार्वजनिक खासगी भागीदारी तत्त्वावर उभारण्यात येतील, मात्र या रुग्णालयावर शासनाचे सर्व नियंत्रण असेल.
१०० कोटींचा निधी
महाकेअर फाऊंडेशनला दैनंदिन भागभांडवल म्हणून सुरुवातीला १०० कोटी रुपये इतका निधी 'कॉर्पस फंड' म्हणून राज्य शासनामार्फत महात्मा जोतिराव फुले जन आरोग्य योजना व आयुष्यमान भारत-प्रधानमंत्री जन आरोग्य योजनेंतर्गत दुर्धर आजारासाठी उभारण्यात येणाऱ्या २० टक्के राखीव निधीतून उपलब्ध करून देण्यात येणार आहे.
मुख्यमंत्र्यांच्या अध्यक्षतेखाली महाकेअर फाऊंडेशन
एल २ व एल ३ स्तरावरील आरोग्य संस्थांना आवश्यकतेनुत्तार मनुष्यबळ उपलब्ध करून देणे, संस्थांचे व्यवस्थापन करणे, पीपीपी धोरण राबवणे तसेच इतर अनुषंगिक बाबी पार पाडणे इ. बाबींसाठी मुख्यमंत्र्यांच्या अध्यक्षतेखाली कंपनी कायदा, २०१३ मधील सेक्शन-८ अंतर्गत महाराष्ट्र कॅन्सर केअर, रिसर्च अँड एज्युकेशन फाऊंडेशन" महाकेअर फाऊंडेशन ही कंपनी स्थापन करण्यात येणार आहे.