मुंबई : दिवसेंदिवस वाढत जाणारी महागाई त्यात उत्पादनाच्या खर्चात वाढ यामुळे दूध उत्पादक शेतकरी आर्थिक संकटात सापडला आहे. दूध उत्पादक शेतकऱ्याला प्रतिलिटर ३५ रुपये खर्च येतो. मिळकत आणि उत्पादनाचा ताळमेळ बसावा यासाठी दूध उत्पादक शेतकऱ्यांना प्रती लिटर ४० रुपये दर मिळावा, अशी मागणी राष्ट्रवादी काँग्रेस शरद पवार पक्षाच्या खासदार सुप्रिया सुळे यांनी दुग्ध विकास मंत्री अतुल सावे यांच्याकडे पत्राद्वारे केली आहे. सुप्रिया सुळे यांनी एक्सवर पोस्ट करत शासनाने तातडीने निर्णय घ्यावा, अशी मागणी केली आहे.
महाराष्ट्र राज्यात दूध व्यवसाय हा शेतकऱ्यांसाठी एक प्रमुख जोडधंदा आहे. तर हा व्यवसाय शेतकऱ्यांच्या उदरनिर्वाहाचे साधन आहे. महाराष्ट्र राज्य देशात दूध उत्पादनात अग्रेसर आहे. राज्यात मोठ्या प्रमाणात दुधाचे संकलन होते. ग्रामीण अर्थव्यवस्थेचा कणा म्हणून दूध व्यवसायाकडे बघितले जाते. परंतु सध्याच्या काळात राज्यातील दूध उत्पादक शेतकरी आर्थिक अडचणीत सापडल्याचे चित्र दिसत आहे. एकीकडे दिवसेंदिवस दूध उत्पादनाचा खर्च वाढत आहे तर दुसरीकडे शासनाकडून दुधाचा दर कमी होत आहेत. यामुळे दूध उत्पादक शेतकरी हवालदिल झाले आहेत, असेही सुप्रिया सुळे यांनी पत्रात नमूद केले आहे.
सुळे यांनी म्हटले आहे की, दूध संघाकडून दुधाला केवळ २७ ते २८ रुपये प्रतिलिटर दर दिला जात आहे व सरकारकडून लिटर मागे ५ रुपये अनुदान दिले गेले. दूधू उत्पादक शेतकऱ्यांना मिळणारा दर आणि अनुदान मिळूनही शेतकऱ्याला उत्पादन खर्च सुद्धा मिळत नाही. ऑक्टोबर २०२४ पासून अनुदान जमा नाही.