मिलिंद सजगुरे/ नाशिक

औद्योगिक, कृषी आणि आर्थिकदृष्ट्या महत्त्वाचे केंद्र म्हणून नाशिक जिल्ह्याची वेगाने वाटचाल सुरू आहे. अभियांत्रिकी, ऑटोमोबाईल, औषधनिर्मिती, अन्नप्रक्रिया, शेती, फलोत्पादन, वाइननिर्मिती, बांधकाम आणि लॉजिस्टिक्स या विविध क्षेत्रांमुळे जिल्ह्याच्या अर्थव्यवस्थेला बळ मिळत आहे. महाराष्ट्र शासनाच्या जिल्हा गुंतवणूक शिखर परिषदेत नाशिकमध्ये सुमारे ६,४०४ कोटी रुपयांच्या गुंतवणुकीचे १४२ सामंजस्य करार करण्यात आले असून, त्यातून सुमारे १४,४०३ रोजगारनिर्मितीची क्षमता निर्माण होण्याची शक्यता आहे.

उपलब्ध आकडेवारीनुसार मुंबई, ठाणे आणि पुण्यानंतर नाशिक ही महाराष्ट्रातील मोठ्या अर्थव्यवस्थांपैकी एक ठरत आहे. २०२४-२५ मध्ये नाशिकच्या सकल जिल्हा देशांतर्गत उत्पादनात (GDDP) १८.२ टक्के वाढ झाल्याचा दावा करण्यात आला आहे. विकासाचा सध्याचा वेग कायम राहिल्यास जिल्ह्याची अर्थव्यवस्था सुमारे २.३४ लाख कोटी रुपयांपर्यंत पोहोचण्याचा अंदाज व्यक्त करण्यात आला आहे. ओझर येथील हिंदुस्तान एअरोनॉटिक्स लिमिटेडच्या (HAL) सुविधेमुळे संरक्षण आणि एअरोस्पेस क्षेत्रालाही नाशिकमध्ये बळ मिळत आहे. द्राक्षे आणि कांदा उत्पादनामुळे कृषी निर्यातीला मोठी क्षमता आहे. समृद्धी महामार्गामुळे नाशिकच्या वाहतूक आणि लॉजिस्टिक्स क्षेत्राला चालना मिळत असून, प्रस्तावित वाढवण बंदरामुळे भविष्यात निर्यात आणि औद्योगिक क्षेत्रासाठी नव्या संधी निर्माण होण्याची अपेक्षा आहे.

सिंहस्थ कुंभमेळा २०२७च्या पार्श्वभूमीवर पायाभूत सुविधा, पर्यटन, हॉटेल व्यवसाय, वाहतूक आणि सेवा क्षेत्रातही गुंतवणुकीला चालना मिळण्याची शक्यता आहे.

कृषी-उद्योगाचा मजबूत आधार

द्राक्षे, कांदा, फलोत्पादन, वाइननिर्मिती आणि कृषीप्रक्रिया उद्योग हे नाशिकच्या अर्थव्यवस्थेचे महत्त्वाचे आधार आहेत. मुंबई आणि पुणे या प्रमुख आर्थिक केंद्रांच्या मधील भौगोलिक स्थानामुळे तसेच रस्ते आणि लॉजिस्टिक्स कनेक्टिव्हिटीमुळे नाशिकमध्ये उद्योग आणि गुंतवणुकीसाठी अनुकूल वातावरण निर्माण झाले आहे. सातपूर, अंबड आणि गोंदे परिसरातील औद्योगिक वसाहतींमध्ये ऑटोमोबाईल, ऑटो-कॉम्पोनंट, अभियांत्रिकी आणि उत्पादन क्षेत्रातील उद्योग कार्यरत आहेत. औषधनिर्मिती, अन्नप्रक्रिया आणि लॉजिस्टिक्स क्षेत्रातही विस्ताराच्या संधी निर्माण होत आहेत. नाशिकला उद्योग, कृषी आणि सेवा क्षेत्रांचा समन्वय लाभत असल्याचे चित्र आहे.

‘तीर्थक्षेत्र ते उद्यमनगरी’ प्रवास

“तीर्थक्षेत्र ते उद्यमनगरी हा नाशिकचा प्रवास थक्क करणारा आहे. पायाभूत सुविधांचा विकास, कृषी उद्योगाची भरारी, शिक्षण क्षेत्रातील प्रगती आणि खासगी औद्योगिक क्षेत्राला आलेला बहर या बाबी नाशिकच्या विकासाला पूरक ठरत आहेत. संरक्षण क्षेत्रातील स्वदेशी धोरणामुळे उद्योगांना बळ मिळत आहे. वाइन उद्योगाच्या विस्तारामुळे अर्थकारणासोबत पर्यटनालाही चालना मिळाली आहे. वाढलेली कनेक्टिव्हिटी आणि सिंहस्थासाठी प्रस्तावित गुंतवणूक पर्यटन क्षेत्रासाठी महत्त्वाची ठरणार आहे,” असे ज्येष्ठ अर्थतज्ज्ञ डॉ. विनायक गोविलकर यांनी सांगितले.

(संबधित इंग्रजी बातमी वाचण्यासाठी येथे क्लिक करा.)