मुंबई : मुंबई पालिकेच्या निवडणुकांसाठी भाजपने प्रचारासाठी आक्रमक रणनीती आखली असून, निवडणूक प्रचारसभांमध्ये मनसे अध्यक्ष राज ठाकरे आणि शिवसेना (ठाकरे गट) पक्षप्रमुख उद्धव ठाकरे यांचे एकमेकांविरोधातील जुने व्हिडीओ दाखवून प्रचार करण्याची रणनिती आखण्याची माहिती सूत्रांकडून मिळत आहे. या रणनीतीमुळे राज्यातील राजकीय वातावरण तापण्याची शक्यता आहे.
राज ठाकरे आणि उद्धव ठाकरे यांनी वेगवेगळ्या काळात एकमेकांवर केलेल्या टीका, आरोप, तसेच राजकीय भूमिकांतील मतभेद अधोरेखित करणाऱ्या भाषणांचे व्हिडीओ क्लिप्स या सभांमध्ये दाखवण्यात येणार आहेत. विशेषतः शिवसेना फुटीनंतर, तसेच विविध निवडणुकांच्या पार्श्वभूमीवर दिलेल्या परस्परविरोधी वक्तव्यांचा प्रचारात वापर करण्याची तयारी भाजपने केली असल्याची माहिती मिळत आहे. भाजपच्या प्रचार रणनीतीमागे मविआतील घटक पक्षांमध्ये असलेला अंतर्गत विसंवाद आणि विरोधाभास मतदारांसमोर आणण्याचा उद्देश आहे.