मुंबई : मुंबईहून दिल्लीला जाण्यासाठी छत्रपती शिवाजी महाराज आंतरराष्ट्रीय विमानतळावर आलेल्या एका महिलेस हवाई गुप्तचर विभागाच्या अधिकार्यांनी अटक केली. व्हिक्टोरिया ओकाफोर असे या महिलेचे नाव असून, तिच्याकडून या अधिकाऱ्यांनी सव्वाकोटीचे ३५० ग्रॅम वजनाचे हेरॉईन ड्रग्जचा साठा जप्त केला आहे. अटकेनंतर तिला किल्ला कोर्टाने चौदा दिवसांची न्यायालयीन कोठडी सुनावली आहे. दिल्लीला जाणाऱ्या विमानातून काहीजण ड्रग्जची तस्करी करणार असल्याची माहिती हवाई गुप्तचर विभागाला मिळाली होती. या माहितीची शहानिशा करण्यासाठी या पथकाने दिल्लीला जाणाऱ्या प्रत्येक प्रवाशांची झडतीसह त्यांच्या सामानाची तपासणी सुरू केली होती. याच दरम्यान व्हिक्टोरिया ओकाफोर या नायजेरीयन महिलेस या अधिकाऱ्यांनी चौकशीसाठी ताब्यात घेतले होते. तिच्या बॅगेची तपासणी केल्यानंतर त्यांना वीस कॅप्सुलमधून ३५० ग्रॅम वजनाचे हेरॉईन सापडले.