मुंबई : मुंबईतील प्रसिद्ध सेठ जी. एस. वैद्यकीय महाविद्यालय आणि केईएम रुग्णालयातील जुने एमआरआय मशीन वारंवार बिघडत असल्यामुळे रुग्ण आणि डॉक्टरांना मोठ्या त्रासाला सामोरे जावे लागत होते. या पार्श्वभूमीवर केईएम रुग्णालयात अखेर नवीन एमआरआय सुविधा उपलब्ध करून दिली जात आहे.
बृहन्मुंबई महानगरपालिकेचे अतिरिक्त महानगरपालिका आयुक्त डॉ. विपिन शर्मा यांनी या नवीन एमआरआय यंत्रणेची उभारणी आणि ती कार्यान्वित करण्याचे काम वेगाने पूर्ण करण्याचे निर्देश अधिकाऱ्यांना दिले आहेत. पालिकेच्या या निर्णयामुळे अत्याधुनिक निदान सेवांसाठी पालिकेच्या या तृतीय श्रेणी आरोग्य सेवा रुग्णालयावर अवलंबून असणाऱ्या हजारो रुग्णांना मोठा दिलासा मिळण्याची शक्यता आहे.
अतिरिक्त आयुक्त डॉ. विपिन शर्मा यांनी गुरुवारी सेठ जी. एस. वैद्यकीय महाविद्यालय आणि केईएम रुग्णालयाला भेट देऊन आढावा घेतला. या भेटीदरम्यान त्यांनी नवीन एमआरआय मशीनशी संबंधित पायाभूत सुविधांच्या कामांच्या प्रगतीची पाहणी केली आणि उर्वरित काम प्राधान्याने पूर्ण करण्याच्या सूचना दिल्या. बृहन्मुंबई महानगरपालिकेने आपल्या मध्यवर्ती खरेदी विभागाच्या माध्यमातून केईएम रुग्णालयासह पालिकेच्या चार प्रमुख रुग्णालयांसाठी चार एमआरआय मशीन खरेदी केल्या आहेत. नवीन एमआरआय मशीन कार्यान्वित झाल्यानंतर, सध्याच्या यंत्रणेतील तांत्रिक बिघाडामुळे निदान सेवांमध्ये वारंवार येणारे अडथळे दूर होण्यास मदत होईल. महाराष्ट्रातील सर्वात मोठ्या सार्वजनिक आरोग्य संस्थांपैकी एक असलेल्या केईएम रुग्णालयात दररोज हजारो रुग्ण उपचारासाठी येतात, ज्यांमधील बहुतांश रुग्ण वेळेवर एमआरआय स्कॅन आणि उपचाराच्या नियोजनासाठी या सुविधेवर अवलंबून असतात.
रुग्णालयाच्या अधिकाऱ्यांनी त्यांना एचएमआयएस प्लॅटफॉर्मच्या कामकाजाची माहिती दिली आणि त्याच्या अंमलबजावणीदरम्यान येणाऱ्या आव्हानांची माहिती दिली. डॉ. शर्मा यांनी सर्व विभागांना एकमेकांमध्ये समन्वय ठेवून काम करण्याचे आणि आरोग्य सेवा अधिक सुलभ आणि नागरिकस्नेही बनवण्यासाठी डिजिटल प्रणालीचा वापर जास्तीत जास्त वाढवण्याचे आदेश दिले.
कर्करोग उपचार सेवा मजबुतीकरणावरही भर
या आढावा भेटीमध्ये रुग्णालयातील कर्करोग उपचार सेवा मजबूत करण्यावरही विशेष भर देण्यात आला. केईएम रुग्णालय आपले शताब्दी वर्ष साजरे करत असल्याच्या पार्श्वभूमीवर, डॉ. शर्मा यांनी रुग्णालयातील पेट स्कॅन सुविधा आणि संबंधित ऑन्कोलॉजी सेवांच्या आधुनिकीकरणाच्या शक्यता तपासण्याचे निर्देश अधिकाऱ्यांना दिले. तांत्रिक सुधारणा आणि सहकार्यात्मक प्रगतीसाठी शेजारील टाटा कर्करोग रुग्णालयासोबत संयुक्त आढावा घेऊन सर्वसमावेशक स्थिती अहवाल तयार करण्याचे निर्देश त्यांनी प्रशासनाला दिले.
डिजिटल प्रणाली विकसित
निदान पायाभूत सुविधांचा आढावा घेण्यासोबतच, डॉ. शर्मा यांनी हॉस्पिटल मॅनेजमेंट अँड इन्फॉर्मेशन सिस्टिम (एचएमआईएस) या डिजिटल प्लॅटफॉर्मचे सविस्तर मूल्यमापन केले. रुग्णांची नोंदणी, भेटीची वेळ, प्रयोगशाळा अहवाल, वैद्यकीय नोंदी, औषध वितरण आणि बिलिंग सेवा एकत्रित करण्यासाठी ही डिजिटल प्रणाली विकसित करण्यात आली आहे.