विविध तांत्रिक कामांसाठी रविवार, १७ जुलै रोजी मध्य, हार्बर आणि पश्चिम रेल्वे मार्गावर ‘मेगाब्लॉक’ घेण्यात आला आहे. मध्य रेल्वेच्या मुख्य मार्गावरील ठाणे-कल्याण, सीएसएमटी-चुनाभट्टी, वांद्रे हार्बर मार्गावर आणि पश्चिम रेल्वेच्या चर्चगेट-मुंबई सेन्ट्रल स्थानकादरम्यान दोन्ही धीम्या मार्गावर ‘मेगाब्लॉक’ आहे. त्यामुळे लोकल फेऱ्या विलंबाने धावतील. हार्बरवरील लोकल फेऱ्या रद्द करण्यात आल्या असून, फक्त विशेष फेऱ्या चालवण्यात येणार आहेत.
मध्य रेल्वेच्या ठाणे-कल्याण अप आणि डाउन जलद मार्गावर सकाळी १०.४० ते दुपारी ३.४० पर्यंत ब्लॉक आहे. यावेळी सीएसएमटी येथून सकाळी ९.३० ते दुपारी २.४५ वाजेपर्यंत सुटणाऱ्या डाउन जलद, अर्धजलद लोकल ठाणे आणि कल्याण स्थानकांदरम्यान धीम्या मार्गावर वळवण्यात येणार आहेत. पश्चिम रेल्वेवर रविवारी चर्चगेट ते मुंबई सेंट्रल दरम्यान दोन्ही धीम्या मार्गावर सकाळी १०.३५ ते दुपारी ३.३५ वाजेपर्यंत ब्लॉक असेल आणि त्यामुळे या दोन स्थानकांदरम्यान लोकल जलद मार्गावरून चालवण्यात येणार आहेत.