उरण : मुंबई आणि जवाहरलाल नेहरू पोर्ट अथॉरिटी (JNPA) यांच्यातील जलवाहतुकीला आधुनिक गती देण्यासाठी ई-स्पीड बोट सेवेच्या ट्रायल रनला सुरुवात झाली आहे. सध्या दीड तासांच्या आसपास असलेला हा प्रवास ई-स्पीड बोटमुळे फक्त ३५ ते ४० मिनिटांत पूर्ण होणार असून प्रवाशांसाठी ही महत्त्वाची सुविधा ठरणार आहे. गेल्या अनेक महिन्यांपासून प्रतीक्षेत असलेल्या या सेवेने बंदर व आसपासच्या परिसरातील प्रवास सुलभ आणि वेगवान होणार आहे.

मागील काही काळात पारंपरिक लाकडी बोटींच्या देखभाल खर्चासह परवाना शुल्कात वाढ झाल्याने आणि अलीकडील अपघातांच्या पार्श्वभूमीवर ई-स्पीड बोटी हा सुरक्षित व परवडणारा पर्याय ठरू शकतो, असे जेएनपीएचे मत आहे.

इलेक्ट्रिक बॅटरीवर चालणाऱ्या य बोटी अत्याधुनिक तंत्रज्ञान, वातानुकूलित सुविधा आणि उच्च सुरक्षेसह सुसज्ज आहेत.

सेवा सुरू करण्यासाठी माझगाव डॉक बिल्डर्स लिमिटेड (MDL) यांना बोट पुरवठा व हाताळणीची जबाबदारी देण्यात आली असून दहा वर्षांसाठी अंदाजे ३७ कोटी ८९ लाख ९४ हजार ९९० रुपयांचा खर्च मंजूर करण्यात आला आहे.

जलद-आरामदायी सागरी प्रवासाचा पर्याय

ई-स्पीड बोट सेवा सुरू झाल्यानंतर जेएनपीएतील कामगार, कस्टम विभाग, एअरफोर्स, सीआयएसएफ, पोर्ट युजर्स व इतर प्रवाशांना सुरक्षित, जलद आणि आरामदायी सागरी प्रवासाचा पर्याय उपलब्ध होणार आहे. ट्रायल रन पूर्ण झाल्यानंतर लवकरच अधिकृत वेळापत्रक आणि तिकीट दर जाहीर होण्याची शक्यता आहे.