मुंबई-पुणे द्रुतगती मार्गावर (एक्स्प्रेसवे) कुसगावजवळील पुलाच्या दुरुस्ती कामामुळे २३ आणि २४ एप्रिल रोजी प्रत्येकी तीन तास वाहतूक तात्पुरती बंद ठेवण्यात येणार आहे. वाहनचालकांनी याची नोंद घेऊन पर्यायी मार्गांचा वापर करावा, असे आवाहन महाराष्ट्र राज्य रस्ते विकास महामंडळाकडून करण्यात आले आहे.

पुलाच्या कामासाठी बंद

महाराष्ट्र राज्य रस्ते विकास महामंडळाने (MSRDC) दिलेल्या माहितीनुसार, यशवंतराव चव्हाण द्रुतगती मार्गावरील डोंगरगाव-कुसगावदरम्यान किमी ५८/५०० येथे असलेल्या पुलाचे शटरिंग काढणे (Shuttering Removal) आणि रंगकाम (Painting) करण्यात येणार आहे. या कामासाठीच वाहतूक बंद ठेवण्याचा निर्णय घेण्यात आला आहे.

मुंबईकडे जाणारी वाहतूक बंद

माहितीनुसार, २३ एप्रिल रोजी दुपारी १२ ते ३ या वेळेत मुंबईकडे जाणारी वाहतूक पूर्णपणे बंद राहील. यादरम्यान वाहनांना किवळे-देहू रोड-तळेगाव मार्गे वळवून राष्ट्रीय महामार्ग ४८ (NH 48) द्वारे कुसगाव टोल नाक्यावर पुन्हा सोडण्यात येईल.

पुण्याकडे जाणारी वाहतूक बंद

२४ एप्रिल रोजी दुपारी १२ ते ३ या वेळेत पुण्याकडे जाणारी वाहतूक बंद ठेवण्यात येणार आहे. वाहनांना कुसगाव टोल नाक्यावरून राष्ट्रीय महामार्ग ४८ वर वळवून देहू रोड-किवळे मार्गे पुण्याकडे पाठवण्यात येईल.

प्रवाशांना आवाहन

अधिकाऱ्यांनी वाहनचालकांना प्रवासाचे नियोजन आधीच करण्याचे आणि या कालावधीत पर्यायी मार्गांचा वापर करण्याचे आवाहन केले आहे, जेणेकरून गैरसोय टाळता येईल.

मदतीसाठी हेल्पलाईन

अडचण आल्यास प्रवाशांनी नियंत्रण कक्ष ९८२२४९८२२४ आणि महामार्ग पोलीस हेल्पलाईन ९८३३४९८३३४ या क्रमांकांवर संपर्क साधण्याचे आवाहन करण्यात आले आहे. तथापि, पुलाच्या दुरुस्तीमुळे काही काळ वाहतुकीत अडथळा येणार असला, तरी सुरक्षिततेच्या दृष्टीने हे काम महत्त्वाचे असल्याचे प्रशासनाने स्पष्ट केले आहे.