वसई : धावत्या लोकलसमोर जाऊन उभं राहणाऱ्या एका माथेफिरूमुळे बुधवारी (दि.०५) वसई-नालासोपारा रेल्वे मार्गावर काही काळ तणावाचे वातावरण निर्माण झाले. भरधाव लोकल थांबवण्याच्या उद्देशाने तो थेट रुळावर उभा राहिला. सुदैवाने मोटरमनने प्रसंगावधान राखत तातडीने आपत्कालीन ब्रेक लावल्याने मोठी दुर्घटना टळली. मात्र, त्यानंतर लोकलमधून उतरलेल्या एका प्रवाशाने संबंधित व्यक्तीला कानशिलात लगावत कॉलर पकडून रुळावरून बाजूला ओढल्याचा व्हिडिओ सध्या सोशल मीडियावर जोरदार व्हायरल होत आहे.
नेमकं काय घडलं?
बुधवारी नालासोपारा आणि वसई रेल्वे स्थानकांदरम्यान हा प्रकार घडला. प्राथमिक माहितीनुसार, मानसिकदृष्ट्या अस्थिर असलेला एक व्यक्ती अचानक रेल्वे रुळावर उतरला आणि समोरून येणाऱ्या लोकलसमोर उभा राहिला. त्या वेळी सिग्नल हिरवा असूनही मोटरमनने परिस्थितीचे गांभीर्य ओळखत तातडीने इमर्जन्सी ब्रेक लावले. त्यामुळे लोकल वेळेत थांबली आणि संभाव्य दुर्घटना टळली.
संतप्त प्रवाशाने कॉलर पकडून लगावली कानशिलात
लोकल थांबताच एक तरुण प्रवासी खाली उतरला. व्हायरल व्हिडिओमध्ये तो संबंधित व्यक्तीजवळ जातो, त्याच्या कानशिलात लगावतो आणि कॉलर पकडून त्याला रुळावरून ओढत सुरक्षित ठिकाणी आणताना दिसतो. या संपूर्ण प्रकारामुळे लोकलमधील प्रवाशांमध्ये काही काळ भीतीचे वातावरण निर्माण झाले होते.
RPF आणि GRP ने घेतले ताब्यात
घटनेची माहिती मिळताच रेल्वे सुरक्षा दल (RPF) आणि सरकारी रेल्वे पोलीस (GRP) घटनास्थळी दाखल झाले. त्यांनी संबंधित व्यक्तीला ताब्यात घेतले असून, त्याने असा प्रकार नेमका का केला, याचा तपास सुरू आहे.
रेल्वेचे आवाहन...
या घटनेचा व्हिडिओ प्रत्यक्षदर्शींनी मोबाईलमध्ये कैद केला असून तो सोशल मीडियावर मोठ्या प्रमाणात शेअर केला जात आहे.
दरम्यान, रेल्वे प्रशासनाने नागरिकांना रुळ ओलांडू नये किंवा रेल्वे वाहतुकीला धोका निर्माण होईल असे कोणतेही कृत्य करू नये, असे आवाहन केले आहे. अशा प्रकारांमुळे केवळ संबंधित व्यक्तीचाच जीव धोक्यात येत नाही, तर हजारो प्रवाशांच्या सुरक्षेवर परिणाम होऊन रेल्वे वाहतुकीतही अडथळे निर्माण होतात, असे रेल्वे अधिकाऱ्यांनी स्पष्ट केले आहे.