मुंबई : मुंबई महापालिका हद्दीत आजघडीला केवळ ८३ ठिकाणी रस्त्यांवरील खड्डे बुजविण्याचे काम बाकी असून आतापर्यंत वेळोवेळी ही कामे करण्यात आल्याची माहिती पालिका प्रशासनाकडून देण्यात आली.

याबाबत अतिरिक्त पालिका आयुक्त अभिजित बांगर यांनी सांगितले की, यंदा जूनपासून पालिका हद्दीत रस्त्यांवर १६ हजार ६४५ ठिकाणी खड्डे पडले होते. त्यापैकी १६ हजार ५६२ ठिकाणचे खड्डे आतापर्यंत बुजविण्यात आले आहेत. आता ८३ ठिकाणी खड्डे भरण्याचे काम बाकी आहे. रस्त्यावरील खड्डे भरण्यासाठी पालिकेकडून मास्टीकचा वापर केला जातो.

सार्वजनिक गणेशोत्सव सोहळ्याबरोबरच अलीकडील काळात गणेश मूर्तींच्या आगमन मिरवणुकाही मोठ्या प्रमाणावर निघतात. अशा मिरवणुकांसाठी रस्तेदुरुस्ती, खड्डे भरण्याची कामे तातडीने करण्याची मागण सार्वजनिक मंडळांच्या समन्वय समितीकडून प्रशासनाकडे सातत्याने केली जाते.