मुंबई : दहिसर विधानसभा मतदारसंघातील मनसे उमेदवाराला एका मतदान केंद्रावर दोन नव्हे तर ५३ मते मिळाली, असे मुंबई पालिकेने मंगळवारी स्पष्ट केले. पराभूत उमेदवार राजेश येरुणकर यांच्या ईव्हीएममध्ये फेरफार केल्याच्या आरोपांचे खंडन केले.
येरुणकर यांनी मतदान डेटा आणि ईव्हीएम क्रमांकामध्ये फरक असल्याचा आरोप केला आहे. त्यांच्या कुटुंबातील चार सदस्यांनी मतदान केलेल्या मतदान केंद्रावर त्यांना दोन मते मिळाली, असे त्यांनी मतमोजणीवर प्रश्नचिन्ह उपस्थित केले. या मतदारसंघातून भाजपच्या मनीषा चौधरी ९८,५८७ मते मिळवून विजयी झाल्या, त्यांनी त्यांचे जवळचे प्रतिस्पर्धी विनोद घोसाळकर यांचा पराभव केला तर तिसऱ्या क्रमांकावर असलेल्या येरुणकर यांना ५,४५६ मते मिळाली. आरोपांना कोणताही तथ्यात्मक आधार नाही, असे पालिकेने निवेदनात म्हटले आहे. पालिका आयुक्त आणि प्रशासक भूषण गगराणी हे २० नोव्हेंबरच्या निवडणुकीत मुंबई शहर आणि मुंबई उपनगरांचे जिल्हा निवडणूक अधिकारी होते.
फॉर्म १७-सी नुसार, ज्यामध्ये प्रत्येक उमेदवाराची तपशीलवार मते नोंदवली जातात, येरुणकर यांना विशिष्ट केंद्रावर ५३ मते मिळाली. बीएमसीने सांगितले की, उमेदवाराला दोन मते मिळाली या तक्रारीत तथ्य नाही. फॉर्म १७सीमधील माहिती आणि ईव्हीएम मतदानाचे आकडेदेखील जुळले आणि दहिसर कार्यालयाला कोणतीही लेखी तक्रार प्राप्त झाली नाही, असे त्यात म्हटले आहे.