देवश्री भुजबळ / मुंबई

राजकीय पक्ष आणि अपक्ष उमेदवारांच्या प्रचारासाठी आचारसंहितेखाली आवश्यक असलेल्या एक खिडकी परवानग्यांसाठी मुंबई महापालिकेने २६ प्रभाग कार्यालयांमध्ये वॉर रूम्स स्थापन केल्या आहेत. यात पक्ष कार्यालय, उमेदवार कार्यालय उभारणे, रोड यात्रा, सार्वजनिक सभांसाठी मंच व मंडप उभारणे तसेच प्रचाराच्या इतर माध्यमांचा समावेश आहे.

मुंबई महापालिका निवडणुकांसाठीचा पूर्ण प्रचार ३ जानेवारीनंतर, अंतिम उमेदवारांची यादी जाहीर झाल्यानंतर सुरू होणार आहे. मात्र, वॉर रूम्सकडे आधीच अनेक अर्ज प्राप्त झाले आहेत. या वॉर रूम्स प्रभाग पातळीवर कार्यरत असून त्यामध्ये मुंबई अग्निशमन दल, उपआयुक्त पोलीस कार्यालय (जे विभागीय पातळीवर समन्वय साधतील), बीएमसी प्रभाग कार्यालयातील कर्मचारी, वाहतूक पोलीस आणि इतर विभागांचे प्रतिनिधी सहभागी आहेत. एक खिडकी प्रणालीमुळे उमेदवारांना निवडणूक प्रचाराशी संबंधित विविध उपक्रमांसाठी लागणाऱ्या परवानग्या एकाच ठिकाणी मिळतात आणि वेळेची बचत होते, अशी माहिती महापालिकेचे संयुक्त आयुक्त आणि निवडणूक प्रक्रियेचे निरीक्षण करणारे विश्वास शंकरवार यांनी दिली.

मुख्यालयात विशेष कक्ष स्थापन

मुंबई महापालिकेने फोर्ट येथील मुख्यालयात पालिका निवडणुकांसाठी एक मुख्य नियंत्रण कक्षही स्थापन केला असून त्यामध्ये माध्यम समितीचा समावेश आहे. ही समिती माध्यमांमध्ये प्रसिद्ध होणाऱ्या जाहिराती किंवा इतर कोणत्याही प्रचारात्मक मजकुरावर देखरेख ठेवणार आहे.