कर्नाटकात हवाई दलाचं ट्रेनिंग विमान कोसळल्याची घटना घडली आहे. चामराजनगर जिल्ह्यातील बोगापुरा गावाजवळ हे विमान कोसळलं आहे. नियमीत उड्डाणानंतर काही वेळातच हे विमान बोगापुरा गावातील एका शेतात कोसळलं. जमिनीवर पडताच विमानाने पेट घेतला. यानंतर अग्निशमन दलाच्या पथकाने तात्काळ घटनास्थळी धाव घेऊन काही मिनिटातच आग विझवली. सुदैवाने या घटनेत कोणतीही जीवितहानी झाली नाही. विमानातील दोन्ही वैमानिक सुरक्षित आहेत. विमान जमिनीवर कोसळण्यापुर्वी दोन्ही वैमानिकांनी पॅराशूटच्या सहाय्याने बाहेर उड्या मारल्याने त्यांचा जीव वाचला आहे.

भारतीय हवाई दलाच्या अधिकाऱ्याने याबाबत माहिती देताना सांगितलं की, आज दुपारच्या सुमारास हवाई दलाचं ट्रेनिंग विमान कोसळलं. या विमानात दोन वैमानिक होते. त्यापैकी एक महिला वैमानिक होती. या घटनेचं कारण अद्याप कळू शकले नाही. वरिष्ठांनी याप्रकरणी चौकशीचे आदेश दिले आहेत. भारतीय हवाई दलाने देखील याबाबत ट्विट केलं आहे. भारतीय हवाई दलाचं किरण ट्रेनर विमान हे आज कर्नाटकातील चामराजनगरमध्ये कोसळलं आहे. विमानातील दोन्ही पायलट सुरक्षित आहेत. विमान कोसळण्यपूर्वी ते दोन्ही बाहेर पडले होते. या अपघाताचे कारण जाणून घेण्यासाठी कोर्ट ऑफ इन्क्वायरीचे आदेश देण्यात आले आहेत, असं या ट्विटमध्ये म्हटलं आहे. या घटनेचे व्हिडिओ समोर आले आहेत. यात शेतात पडलेल्या विमानाभोवती परिसरातील अनेक शेतकरी आणि गावकरी जमा झाले होते.