अयोध्या : येथील राम मंदिर परिसरात नमाज पढण्याचा प्रयत्न करणाऱ्या काश्मिरी व्यक्तीला सुरक्षारक्षकांनी ताब्यात घेतले आहे.
सुरक्षा यंत्रणांनी सांगितले की, पकडण्यात आलेली व्यक्ती राम मंदिर परिसरात नमाज पढण्याचा प्रयत्न करत होती. ही घटना मंदिराच्या दक्षिण भागात घडली. मंदिराच्या सुरक्षारक्षकांनी संबंधित व्यक्तीला नमाज पढण्यापासून रोखले. त्यानंतर त्याने विशिष्ट समुदायाची घोषणाबाजी केली.
या घटनेनंतर गुप्तचर यंत्रणा, पोलीस व वरिष्ठ पोलीस घटनास्थळी पोहचले. त्यांनी संबंधित व्यक्तीची चौकशी सुरू केली. पकडलेल्या व्यक्तीचे नाव अब्दुल अहद शेख असे आहे. तो जम्मू-काश्मीरच्या शोपिया जिल्ह्यातील आहे. मंदिरात दर्शन केल्यानंतर सीता रसोई येथे नमाज पढण्याचा प्रयत्न करत होता.
ही व्यक्ती अयोध्येत का आली? कोणाच्या सांगण्यावरून आली, मंदिर परिसरात तो का गेला? नमाज पढण्यामागे त्याचा उद्देश काय होता? याचा तपास सुरक्षा यंत्रणा करत आहेत. अयोध्या पोलीस व गुप्तचर यंत्रणांनी याबाबत काश्मीरमध्येही चौकशी सुरू केली. शोपिया येथील या व्यक्तीच्या घरी सुरक्षा यंत्रणा पोहचली आहे. तेथे त्याच्या मुलाने सांगितले की, वडील चार ते पाच दिवसांपूर्वीच घरातून निघाले आहेत. ते अयोध्येला पोहचले याची काहीच माहिती नाही.