चमोली : अयोध्या येथील राम मंदिरातील देणग्यांच्या अपहारामुळे निर्माण झालेल्या वादाच्या पार्श्वभूमीवर, आता श्री बद्रीनाथ धाम येथे अर्पण करण्यात आलेल्या देणग्यांमध्येही अशाच स्वरूपाचे गैरव्यवहार झाल्याचे उघडकीस आले आहे. या प्रकरणाची गंभीर दखल घेत बद्रीनाथ-केदारनाथ मंदिर समितीने चौकशीचे आदेश दिले आहेत.
मंदिर समितीचे अध्यक्ष हेमंत द्विवेदी यांनी सांगितले की, सोशल मीडियावर फिरणाऱ्या या आरोपांची मंदिर समितीने अत्यंत गांभीर्याने दखल घेतली असून, संपूर्ण प्रकरणाची निष्पक्ष आणि पारदर्शक पद्धतीने चौकशी करण्यासाठी समिती स्थापन करण्यात आली आहे. या आरोपांमध्ये ज्या कर्मचाऱ्यांची नावे समोर आली आहेत, त्यांना कारणे दाखवा नोटीस बजावून स्पष्टीकरण मागवण्यात आले आहे.
तो 'वैयक्तिक सचिव' नाही
या कथित गैरव्यवहारात नाव आलेल्या एका कर्मचाऱ्याला सोशल मीडियावर हेमंत द्विवेदी यांचा 'वैयक्तिक सचिव' म्हटले जात आहे. मात्र, द्विवेदी यांनी हा दावा पूर्णपणे फेटाळून लावला आहे.