नवी दिल्ली/मुंबई : बोईंगने काही 'बी७३७ मॅक्स' विमानांमध्ये एक सॉफ्टवेअर दोष शोधून काढला आहे. यामुळे लँडिंगचा प्रयत्न अयशस्वी झाल्यानंतर स्वयंचलित उड्डाण मार्गदर्शन प्रणाली बंद होऊ शकते. विमान निर्माता कंपनी यावर कायमस्वरूपी उपायासाठी काम करत आहे, अशी माहिती सूत्रांनी दिली आहे.
बोईंग प्रवक्त्याने सांगितले की, अभियंते समस्येचे कायमस्वरूपी निवारण करण्यासाठी सॉफ्टवेअर अपडेटवर काम करत आहेत. गेल्या महिन्यात आम्ही सर्व ७३७ ऑपरेटरना या सॉफ्टवेअर त्रुटीबद्दल माहिती दिली होती, ज्यामुळे लँडिंगदरम्यान वैमानिकांना ऑटोमेशनमध्ये घट अनुभवता येऊ शकते.
भारतात एअर इंडिया एक्स्प्रेस आणि आकासा एअरद्वारे संचलित ९६ बोईंग ७३७ मॅक्स विमाने ताफ्यात कार्यरत आहेत.
एअर इंडिया एक्स्प्रेसकडे ५३ विमाने आहेत. तर आकासा एअर सध्या ४३ अशी विमाने चालवते.