बंगळुरू : बंगळुरू हे एक शहर आहे जे अपेक्षांना आविष्कार आणि यशाशी जोडते. बंगळुरू भारताच्या तांत्रिक क्षमतांना जागतिक पुरवठ्याशी जोडते. बोइंगचे हे नवीन कॅम्पस बंगळुरूची ओळख आणखी मजबूत करेल. हे बोइंगचे अमेरिकेबाहेरचे सर्वात मोठे केंद्र असेल, असे प्रतिपादन पंतप्रधान नरेंद्र मोदी यांनी केले.
पंतप्रधान नरेंद्र मोदी यांनी कर्नाटकातील बंगळुरू येथे शुक्रवारी अमेरिकन विमान उत्पादक कंपनी बोइंगच्या नवीन ग्लोबल अभियांत्रिकी आणि तंत्रज्ञान केंद्राचे उद्घाटन केले. त्यावेळी ते बोलत होते. यावेळी कर्नाटकचे मुख्यमंत्री सिद्धरामय्या, राज्यपाल थावरचंद गेहलोत आणि बोइंगचे उच्चपदस्थ अधिकारीही उपस्थित होते.
बोइंगचे हे कॅम्पस ४३ एकरात पसरले असून ते बांधण्यासाठी १६०० कोटी रुपये खर्च आला आहे. बोइंगचे हे केंद्र अमेरिकेबाहेर कंपनीची सर्वात मोठी गुंतवणूक आहे. हे बंगळुरूच्या बाहेरील देवनाहल्ली येथे स्थित एक हाय-टेक संरक्षण आणि एरोस्पेस पार्क कॅम्पस आहे. हे केंद्र जागतिक एरोस्पेस आणि संरक्षण उद्योगासाठी पुढील पिढीतील प्रगत उत्पादने आणि सेवा विकसित करेल. पंतप्रधानांनी ‘बोइंग सुकन्या कार्यक्रम’ देखील सुरू केला. त्याचा उद्देश देशातील वाढत्या विमान वाहतूक क्षेत्रात भारतातील अधिकाधिक मुलींना प्रोत्साहन देणे आहे. हा कार्यक्रम मुली आणि महिलांना विज्ञान, तंत्रज्ञान, अभियांत्रिकी आणि गणित (एसटीईएम) क्षेत्रातील गंभीर कौशल्ये शिकण्याची आणि विमान वाहतूक क्षेत्रातील नोकऱ्यांसाठी प्रशिक्षण प्रदान करेल. कार्यक्रमांतर्गत १५० ठिकाणी केंद्रे सुरू करण्यात येणार आहेत.