उधमपूर : जम्मू-काश्मीरच्या उधमपूरमध्ये केंद्रीय राखीव पोलीस दलाच्या (सीआरपीएफ) जवानांना घेऊन जाणारे एक वाहन खोल दरीत कोसळले. या दुर्घटनेत तीन जवानांचा मृत्यू झाला असून १५ हून अधिक जवान जखमी झाले आहेत. जखमी जवानांना रुग्णालयात दाखल करण्यात आले असून त्यांच्यावर उपचार चालू आहेत.

दरम्यान, स्थानिकांनी व पोलिसांनी बचावकार्य सुरू केले आहे. केंद्रीय राखीव पोलीस दलाच्या १८७ व्या बटालियनची बस उधमपूर जिल्ह्यातील कदवा येथील बसंत गढाचा घाट चढत असताना २०० फूट खोल दरीत कोसळली. सर्व जखमी जवानांना एअरलिफ्ट करून उधमपूरमधील भारतीय लष्कराच्या रुग्णालयात दाखल करण्यात आले आहे. या दुर्घटनेचे कारण अद्याप समोर आलेले नाही.