नैनीताल : नैनितालमध्ये बस खोल दरीत कोसळून झालेल्या दुर्घटनेत तीन जण ठार झाले असून २४ जण जखमी झाले आहेत. या घटनेचे वृत्त कळताच तातडीने मदतकार्य सुरू करण्यात आले असून जखमींना रुग्णालयात दाखल करण्यात आले आहे.

ही बस पिठोरगढहून हल्द्वानीला जात असताना भीमतालजवळ हा अपघात झाला. या अपघातात तिघांचा मृत्यू झाल्याची प्राथमिक माहिती आहे. पोलीस आणि प्रशासनाच्या बचाव पथकाकडून मदतकार्य सुरू आहे. मृतांमध्ये एक महिला आणि दोन पुरुष असल्याचे सांगण्यात येत आहे. बस खोल दरीत कोसळल्याने मदतकार्य पोहोचण्यास अडथळे येत आहेत.

उत्तराखंडचे मुख्यमंत्री पुष्कर सिंह धामी यांनी भीमताल बस अपघाताबाबत सोशल मीडिया एक्सवर माहिती शेअर केली आहे. मुख्यमंत्र्यांनी म्हटले आहे की, भीमतालजवळ बस अपघात झाल्याची बातमी अत्यंत दुःखद आहे. स्थानिक प्रशासनाला तातडीने मदत आणि बचाव कार्य करण्याचे निर्देश देण्यात आले आहेत.