आज संपूर्ण देशभरात भक्तीमय वातावरण आहे. केंद्र शासनाने राम मंदिर प्राणप्रतिष्ठा सोहळ्यासाठी आज अर्धा दिवस सुट्टी जाहीर केली आहे. महाराष्ट्र सरकारसह अनेक राज्यात सुट्टी जाहीर करण्यात आली आहे. या सोहळ्यासाठी शहरे, रस्ते सजवण्यात आले आहेत. मंदिरांमध्ये भजन, कीर्तन सुरु आहेत.

कामानिमित्त घराबाहेर जावे लागणाऱ्या भाविकांमध्ये हा उत्साह कायम दिसतोय. मुंबईकर चाकरमानी लोकलमध्ये प्रभू श्री रामाचा भजन कीर्तन करत असल्याचा व्हिडिओ व्हायरल झाला आहे. त्याचवेळी दिल्लीहून अयोध्येला जाणाऱ्या विमानातील प्रवासीही रामाच्या भक्तीत लीन झाल्याचे दिसले. विमानातील प्रवाशांनी प्रभू श्रीरामाचे भजन गायले. याचा व्हिडिओही व्हायरल झाला आहे.

IndiGo फ्लाइटमध्ये भजन-

दिल्लीहून अयोध्या जाणाऱ्या विमानात भाविक आणि प्रवासी श्रीरामाची भजने गात आहेत. इंडिगोच्या विमानात राम भजनावर भाविक ठेके धरत आहेत. 'राम सिया राम'ची धून गाताना लोक दिसत आहे. व्हिडिओत भगवे वस्त्र परिधान करणारा एक भाविक राम भजन म्हणत आहे. त्याला विमानात बसलेले इतर लोक देखील प्रतिसाद देत आहेत.

मुंबई लोकलमध्ये राम धून-

मुंबईत सरकारी कार्यालयांना सुट्टी आहे. परंतु मुंबई नेहमीप्रमाणे धावत आहेत. यावेळी लोकलमध्ये राम भजने गाताना मुंबईतील चाकरमानी दिसले. विरारवरुन चर्चगेटला जाणाऱ्या लोकल ट्रेनमधील प्रवाशांचा व्हिडिओ व्हायरल झाला आहे. भगवान श्री रामाचे पोस्टर लावून मुंबईकर भजने गाताना दिसत आहेत.