नवी दिल्ली : पंतप्रधान नरेंद्र मोदी यांच्याविरोधात २०१९ मध्ये केलेल्या वादग्रस्त वक्तव्याप्रकरणी काँग्रेस खासदार राहुल गांधी यांना सर्वोच्च न्यायालयाकडून मोठा दिलासा मिळाला आहे. सर्वोच्च न्यायालयाने महाराष्ट्रातील ट्रायल कोर्टात सुरू असलेल्या मानहानीच्या खटल्याच्या पुढील कारवाईला स्थगिती दिली आहे.
मंगळवारी न्या. विक्रम नाथ आणि न्या. अपरेश कुमार सिंग यांच्या खंडपीठाने महाराष्ट्र सरकार आणि तक्रारदार एम. एच. श्रीमाळ यांना नोटीस बजावली असून, चार आठवड्यांच्या आत उत्तर मागितले आहे. खंडपीठाने आपल्या आदेशात म्हटले आहे की, "नोटीस चार आठवड्यांत परत करण्यायोग्य राहील. ट्रायल कोर्टापुढील पुढील कार्यवाही स्थगित राहील.
रायबरेलीचे खासदार राहुल गांधी यांनी मुंबई उच्च न्यायालयाच्या ८ सप्टेंबरच्या आदेशाला आव्हान देत सर्वोच्च न्यायालयात याचिका दाखल केली होती. उच्च न्यायालयाने त्यांच्याविरुद्ध जारी केलेले समन्स रद्द करण्यास नकार दिला होता. या याचिकेवर सुनावणी करताना सर्वोच्च न्यायालयाने हा अंतरिम आदेश दिला आहे.