मुंबई : वैद्यकीय व दंत अभ्यासक्रमाच्या दुसऱ्या फेरीतील प्रवेशाचे वेळापत्रक वैद्यकीय समुपदेशन समितीने जाहीर केले आहे. त्यानुसार राज्य सामाईक प्रवेश परीक्षा कक्षाकडून वैद्यकीय व दंत अभ्यासक्रमाच्या दुसऱ्या प्रवेश फेरीला २६ सप्टेंबरपासून सुरुवात होत आहे. तर १ ऑक्टोबरपासून वैद्यकीय व दंत अभ्यासक्रमाचे शैक्षणिक वर्ष सुरू होणार आहे.

वैद्यकीय व दंत अभ्यासक्रमाच्या प्रवेशाचे वेळापत्रक नवी दिल्लीतील वैद्यकीय समुपदेशन समितीमार्फत जाहीर करण्यात येते. त्यानुसार प्रवेशाच्या वेळापत्रकाची अंमलबजावणी राज्य सामाईक प्रवेश परीक्षा कक्षाकडून करण्यात येते. वैद्यकीय व दंत अभ्यासक्रमाची पहिली प्रवेश फेरी ५ सप्टेंबर रोजी संपली. या फेरीमध्ये रिक्त राहिलेल्या जागांवर प्रवेश करण्यासाठी वैद्यकीय समुपदेशन समितीने दुसऱ्या फेरीचे वेळापत्रक जाहीर केले आहे.