चेन्नई : तामिळनाडूचे मुख्यमंत्री एम. के. स्टॅलिन यांनी सीमांकनाच्या मुद्द्यावर एक बैठक आयोजित केली असून त्यासाठी ७ राज्यांच्या मुख्यमंत्र्यांना निमंत्रित केले आहे. यामध्ये पश्चिम बंगालच्या मुख्यमंत्री ममता बॅनर्जी आणि भाजपशासित ओदिशाचे मुख्यमंत्री मोहन चरण माझी यांचाही समावेश आहे.
सीमांकनाच्या मुद्द्यावरून गेल्या काही दिवसांपासून देशातील राजकारण तापले आहे. यामुळे उत्तर भारताच्या तुलनेत दक्षिण भारतातील खासदारांची संख्या कमी होणार असल्याचा गावा स्टॅलिन यांनी केला आहे. त्या पार्श्वभूमीवर ही बैठक बोलाविण्यात आली आहे.
स्टॅलिन यांनी या सर्व मुख्यमंत्र्यांना केंद्राच्या प्रस्तावित सीमांकनाला विरोध करण्यासाठी स्थापन केलेल्या संयुक्त कृती समितीमध्ये सामील होण्याचे आवाहन केले आहे. त्यांनी केरळचे मुख्यमंत्री पी. विजयन, कर्नाटकचे सिद्धरामय्या, तेलंगणाचे रेवंत रेड्डी, आंध्रचे चंद्राबाबू नायडू, पुद्दुचेरीचे एन. रंगास्वामी, पश्चिम बंगालच्या ममता बॅनर्जी आणि भाजपशासित ओदिशाचे मुख्यमंत्री मोहन चरण माझी यांनाही २२ मार्च रोजी चेन्नई येथे होणाऱ्या बैठकीसाठी आमंत्रित केले आहे.
स्टॅलिन यांनी या राज्यांतील राजकीय पक्षांच्या वरिष्ठ नेत्यांनाही बैठकीसाठी बोलावले आहे. त्यांनी सोशल मीडिया प्लॅटफॉर्मवर लिहिले की, सीमांकन हा संघराज्य वादावरील एक निंदनीय हल्ला आहे. यामुळे संसदेतील आमचा आवाज कमी होतो आणि लोकसंख्या नियंत्रण करणाऱ्या राज्यांना शिक्षा मिळते. हा अन्याय आम्ही होऊ देणार नाही. दरम्यान, पुढील वर्षी तामिळनाडूत विधानसभा निवडणुका आहेत. या पार्श्वभूमीवर एमके स्टालिन हिंदी आणि सीमांकनाच्या मुद्द्यावरून केंद्र सरकारला धारेवर धरत आहेत.