तिरुवल्लूर (तमिळनाडू) : पेरियापालायम जवळील मांजकरणै येथील एका खासगी सागरी अन्न प्रक्रिया युनिटमध्ये अमोनिया वायूची गळती होऊन झालेल्या दुर्घटनेत ७ महिलांचा मृत्यू झाला असून ६७ जण जखमी झाले आहेत, अशी माहिती तिरुवल्लूरच्या जिल्हाधिकारी एस. कविता यांनी रविवारी सांगितले. ४६ जणांवर वेल्स रुग्णालयात आणि २१ जणांवर व्यंकटेश्वर रुग्णालयात उपचार सुरू आहेत. यापैकी अत्यंत गंभीर नऊ रुग्णांना रुग्णवाहिकेद्वारे चेन्नई येथील शासकीय स्टेनली वैद्यकीय महाविद्यालय रुग्णालयात हलवण्यात आले आहे.
आम्ही एकूण ४४ रुग्णांना दाखल केले असून, यात ४३ तरुण महिला आणि एका पुरुषाचा समावेश आहे. यापैकी १५ ते १६ रुग्णांना ‘इंट्युबेट’ करण्यात आले आहे, तर ११ रुग्ण सध्या व्हेंटिलेटर सपोर्टवर आहेत," असे डॉक्टरांनी पत्रकारांना सांगितले.
जिल्हाधिकारी कविता यांनी कारखान्याला भेट देऊन मदतकार्याचा आढावा घेतला. तसेच रुग्णांची विचारपूस केली. या निर्यात युनिटमधील संभाव्य सुरक्षा त्रुटींची चौकशी करण्यासाठी अधिकृत चौकशीचे आदेश देण्यात आले आहेत.