जगातील सर्वात मोठे उद्योगपती इलॉन मस्क यांनी काही महिन्यांपूर्वी ट्विटरवर ताबा मिळवला. त्यानंतर ट्विटरमध्ये अनेक बदल करण्यात आले. (Twitter Blue Tick) आता ट्विटरने मोबाईलसाठी ट्विटर ब्लू टिकची सबस्क्रिप्शन किंमत जाहीर केली आहे. आता ब्लू टिकसाठी युझर्सना महिन्याला ११ डॉलर्स म्हणजे अंदाजे ९०० रुपये द्यावे लागणार आहेत. अँड्रॉईड आणि आय फोन दोन्हीसाठी समान किंमत असणार आहे. मासिक शुल्काच्या तुलनेत ट्विटरकडून वेब वापरकर्त्यांसाठी मात्र स्वस्त वार्षिक योजना जाहीर करण्यात आली.

सध्या ट्विटर हा प्रत्येकाच्या दैनंदिन जीवांचा भाग झाला आहे. राजकारणी, प्रसिद्ध व्यक्ती, पत्रकार आणि सार्वजनिक क्षेत्रातल्या महत्त्वाच्या व्यक्तींना ट्विटरकडून ब्लू टिक देण्यात येते. याआधी ही सेवा विनामूल्य होती. इलॉन मस्क हे ट्विटरचे मालक झाल्यानंतर यामध्ये बदल करण्यात आले. ट्विटरच्या ब्लू टिकसाठी सबस्क्रिप्शन फी आकारण्याची घोषणा यापूर्वीच इलॉन मस्क यांनी केली होती. गेल्या काही दिवसांपासून ट्विटरमध्ये होणाऱ्या घडामोडींकडे सर्वांचे लक्ष आहे. कर्मचारी कपात, मस्क यांच्यावर होणारी टीका अशा अनेक चर्चा सध्या सुरु आहेत. यामध्ये आता या निर्णयामुळे वापरकर्त्यांवर काय परिणाम होते? हे पाहणे महत्त्वाचे ठरणार आहे.