उत्तर प्रदेशातील बागपत जिल्ह्यातून प्राण्यांवरील क्रूरतेची धक्कादायक घटना समोर आली आहे. एका व्यक्तीने भटक्या कुत्र्याला जबरदस्तीने दारू पाजत त्याचा छळ केल्याचा प्रकार कॅमेऱ्यात कैद झाला आहे. या घटनेचा व्हिडीओ सोशल मीडियावर व्हायरल झाल्यानंतर तीव्र संताप व्यक्त केला जात आहे.
व्हायरल व्हिडीओत काय?
समोर आलेल्या व्हिडीओमध्ये, एक व्यक्ती कुत्र्याला जबरदस्तीने पकडून ठेवताना, त्याचं तोंड उघडून थेट बाटलीतून दारू ओतताना दिसतो. कुत्रा स्वतःला सोडवण्यासाठी झगडत असताना, वेदनेने विव्हळताना दिसतो. मात्र तरीही ती व्यक्ती निर्दयीपणे कुत्र्याला दारू पाजतो. या संतापजनक कृत्यामुळे सोशल मीडियावर प्रचंड संतापाची लाट उसळली आहे.
आरोपी अटकेत
पीटीआयच्या वृत्तानुसार, त्या व्यक्तीची ओळख जितेंद्र उर्फ बल्लम अशी असून तो किर्थल गावचा रहिवासी आहे. पोलिसांनी त्याला रामाला पोलीस ठाणे हद्दीतून अटक केली आहे. त्याच्यावर प्राण्यांवरील क्रूरता प्रतिबंधक कायदा अंतर्गत गुन्हा दाखल करण्यात आला असून पुढील कायदेशीर कारवाई सुरू आहे.
बंगळुरूमधील आणखी एक धक्कादायक प्रकार
दरम्यान, प्राण्यांवरील क्रूरतेचा आणखी एक धक्कादायक प्रकार बंगळुरूच्या बागलूर परिसरात समोर आला आहे. येथे एका घरकाम करणाऱ्या महिलेने लिफ्टमध्ये पिल्लाला जमिनीवर आपटून ठार मारल्याचा आरोप आहे. ही घटना एका अपार्टमेंटमध्ये घडली असून, बागलूर पोलीस ठाण्याच्या हद्दीत या प्रकरणाची चौकशी सुरू आहे.
सलग समोर येणाऱ्या अशा घटनांमुळे प्राण्यांच्या सुरक्षेबाबत गंभीर प्रश्न उपस्थित होत असून, दोषींवर कठोर कारवाईची मागणी होत आहे.