नवी मुंबई : वाशी सेक्टर-२ मधील मेघराज मेघदूत थिएटरच्या जागेवर बांधकाम सुरू असलेल्या वन अक्षर भगवती कन्स्ट्रक्शनच्या साइटवर सेंट्रिंगचे काम करणाऱ्या कामगाराचा ३० फुटावरून पडून मृत्यू झाल्याची घटना शनिवारी दुपारी घडली. याप्रकरणी वाशी पोलिसांनी अकस्मात मृत्यूची नोंद करून पुढील तपासाला सुरुवात केली आहे.

या दुर्घटनेत मृत कामगाराचे नाव अनिल सुराली प्रसाद (४९) असे असून तो उत्तर प्रदेश राज्यातील रहिवासी आहे. सध्या तो वन अक्षर भगवती कन्स्ट्रक्शनच्या वतीने वाशी सेक्टर-२ मधील मेघराज मेघदूत थिएटरच्या जागेवर सुरू असलेल्या कन्स्ट्रक्शन साइटवर काम करत होता.

गत शनिवारी दुपारच्या सुमारास अनिल प्रसाद हा सदर बांधकामाच्या साइटवर सेंट्रिंगचे काम करत असताना त्याचा तोल गेल्याने तो ३० फुटावरून खाली पडला. या दुर्घटनेत गंभीर जखमी झालेल्या अनिल प्रसादला तत्काळ वाशीतील महापालिकेच्या रुग्णालयात दाखल करण्यात आले. मात्र दाखल करण्यापूर्वीच त्याचा मृत्यू झाल्याचे तेथील डॉक्टरांनी घोषित केले.