बार्बाडोस : ३७ वर्षीय अनुभवी अष्टपैलू आंद्रे रसेलने आंतरराष्ट्रीय क्रिकेटमधून निवृत्ती जाहीर केली आहे. ऑस्ट्रेलियाविरुद्ध होणाऱ्या पहिल्या दोन टी-२० सामन्यांनंतर तो निवृत्त होणार आहे. मात्र जगभरातील विविध फ्रँचायझी टी-२० लीगमध्ये रसेल खेळत राहणार आहे.
२०१०मध्ये विंडीजसाठी पदार्पण करणाऱ्या रसेलने १ कसोटी, ५६ एकदिवसीय आणि ८४ टी-२० सामन्यांत देशाचे प्रतिनिधित्व केले. विंडीजच्या २०१२ व २०१६च्या टी-२० विश्वचषक विजेत्या संघाचा रसेल भाग होता. मात्र गेल्या काही वर्षांत विंडीज क्रिकेट मंडळात सुरू असलेले राजकारण आणि अन्य वादांमुळे रसेल फक्त फ्रँचायझी लीगमध्ये खेळताना दिसायचा. आता २३ जुलै रोजी घरच्या मैदानात किंग्स्टन येथे रसेल अखेरचा आंतरराष्ट्रीय सामना खेळताना दिसेल.
“वेस्ट इंडिजच्या क्रिकेट संघाचे प्रतिनिधित्व करणे हे माझे स्वप्न होते. गेली १५ वर्षे मी हे स्वप्न जगलो. देशासाठी विश्वचषकही जिंकता आल्याचे समाधान आहे. मात्र आता थांबण्याची वेळ आली असून घरच्या प्रेक्षकांसमोरच अखेरचा आंतरराष्ट्रीय सामना खेळण्यासाठी मी आतुर आहे,” असे रसेल म्हणाला.
उजव्या हाताने फलंदाजी व मध्यमगती गोलंदाजी करणाऱ्या रसेलने २०१६च्या टी-२० विश्वचषकातील उपांत्य फेरीत भारताविरुद्ध छाप पाडली होती. गेल्या दशकभरापासून रसेल आयपीएलमध्ये कोलकाता संघाचा अविभाज्य घटक म्हणून उदयास आला आहे.