नागोया : आशियाई क्रीडा स्पर्धेत मंगळवारच्या १०व्या दिवशी नारीच्या भरारीमुळे भारताने दुहेरी सुवर्णवेध साधला. ॲथलेटिक्समध्ये ४ बाय ४०० मीटर शर्यतीत भारतीय महिलांच्या चौकटीने सुवर्णपदक पटकावले, तर नेमबाजीतील वैयक्तिक ट्रॅप प्रकारात नीरू धांडाने ऐतिहासिक सोनेरी यश संपादन केले. दिवसभरात भारताने एकूण ८ पदकांची कमाई करून पदकतालिकेतही आगेकूच केली.
जपान येथे सुरू असलेल्या २०व्या आशियाई क्रीडा स्पर्धेत मंगळवारी भारताने एकूण २ सुवर्ण, १ रौप्य, ५ कांस्य अशी ८ पदके जिंकली. सलग दुसऱ्या दिवशी भारताने आठ पदके कमावली. मंगळवारी नेमबाजीत भारताने २ पदके पटकावली. तसेच बॉक्सिंगमध्येही कांस्यपदक जिंकले. भारताची एकूण पदकसंख्या ५३ झाली असून यामध्ये ६ सुवर्ण, २१ रौप्य व २६ कांस्यपदकांचा समावेश आहे. भारताने आता पदकतालिकेत १२व्या क्रमांकावरून १०वे स्थान मिळवले आहे. चीन १४३ सुवर्णपदकांसह अग्रस्थानी विराजमान आहे.
४ ऑक्टोबरपर्यंत ही स्पर्धा रंगणार असून पुढील ५ दिवसांत भारत पदकांच्या शतकापर्यंत पोहोचणार का, हे पाहणे रंजक ठरेल. २०२३च्या आशियाई स्पर्धेत भारताने १०६ पदके जिंकली होती. यंदा भारतापुढे ही पदकसंख्या ओलांडण्याचे आव्हान आहे.
पदकतालिकेत कूच
भारताने मंगळवारी दिवसभरात आठ पदकांची कमाई केली. यामध्ये २ सुवर्ण, १ रौप्य, ५ कांस्यपदकांचा समावेश होता. सध्या ६ सुवर्ण, २१ रौप्य, २६ कांस्य अशा एकूण ५३ पदकांसह भारत पदकतालिकेत १०व्या क्रमांकावर आहे.