पर्थ : आंद्रे रसेल (२९ चेंडूंत ७१ धावा) आणि शर्फेन रुदरफोर्ड (४० चेंडूंत नाबाद ६७ धावा) या दोघांचा रुद्रावतार मंगळवारी चाहत्यांना पाहायला मिळाला. रसेल व रुदरफोर्डने सहाव्या विकेटसाठी ६६ चेंडूंतच रचलेल्या १३९ धावांच्या विश्वविक्रमी भागीदारीच्या बळावर वेस्ट इंडिजने तिसऱ्या टी-२० सामन्यात ऑस्ट्रेलियाचा ३७ धावांनी पराभव केला. मात्र या पराभवानंतरही ऑस्ट्रेलियाने पहिले दोन लढती जिंकल्यामुळे मालिकेत २-१ असे यश संपादन केले.

प्रथम फलंदाजी करताना विंडीजने २० षटकांत ६ बाद २२० धावांचा डोंगर उभारला. रसेलने ४ चौकार व ७ षटकारांची आतषबाजी केली, तर रुदरफोर्डने प्रत्येकी ५ चौकार व ५ षटकार लगावले. ५ बाद ७९ धावांवरून या दोघांनी १३९ धावांची भागीदारी रचली. रॉस्टन चेसने ३७ धावा केल्या.

लक्ष्याचा पाठलाग करताना ऑस्ट्रेलियाला २० षटकांत ५ बाद १८३ धावांपर्यंतच मजल मारता आली. डेव्हिड वॉर्नरने ४९ चेंडूंत ८१ धावा फटकावताना ९ चौकार व ३ षटकार लगावले. तसेच टिम डेव्हिडने १९ चेंडूंतच नाबाद ४१ धावा फटकावल्या. मात्र ग्लेन मॅक्सवेल (१२), कर्णधार मिचेल मार्श (१७), जोश इंग्लिस (१) यावेळी अपयशी ठरल्याने कांगारूंना पराभव पत्करावा लागला.