ठाणे : मुंबई शहराच्या सरस्वती स्पोर्ट्स क्लबने नवी मुंबईच्या ग्रीफिन जिमखान्याचा अवघ्या एका गुणाने पराभव करत श्री आनंद भारती समाजाने चंपाषष्ठी उत्सवानिमित्त आयोजित केलेल्या त्रिजिल्हास्तरीय खो-खो स्पर्धेचे विजेतेपद पटकावले. हा सामना सरस्वती स्पोर्ट्स क्लबने १३-१२ असा जिंकला.
सरस्वती स्पोर्ट्स क्लबने सामन्याच्या पूर्वार्धात ८-७ अशी नाममात्र आघाडी घेतली होती. हीच आघाडी त्यांना विजेतेपदाकडे घेऊन गेली. आपल्या संघाला विजेतेपद मिळवून देताना रोहन टेमकरने २ मिनिटे संरक्षण करताना आक्रमणात २ गडी बाद केले. त्याला प्रसाद पठाडे (२.२० मि.) व चैतन्य धुळूप (३ गडी) यांनी सुरेख साथ दिली. पराभूत संघाकडून सुफियान शेखने (१.२० मि., ३ गडी) दमदार खेळ केला. सुफियान शेख स्पर्धेतील सर्वोत्तम आक्रमक, तर प्रसाद पहाडे सर्वोत्तम संरक्षक ठरला. राहुल जावळेला स्पर्धेतील सर्वोत्तम अष्टपैलूच्या पुरस्काराने गौरवण्यात आले.